«عۇمىر-داريا» اتتى شىعارماشىلىق كەشى ءوتتى.
قازاقستاننىڭ ەڭبەك ەرى، حالىق جازۋشىسى مۇحتار شاحانوۆ 80 جاستا. مەرەيتوي اياسىندا الماتىنىڭ رەسپۋبليكا سارايىندا اقىننىڭ «عۇمىر-داريا» اتتى شىعارماشىلىق كەشى ءوتتى، دەپ حابارلايدى Almaty-akshamy.kz Almaty.tv سىلتەمە جاساپ.
ونەگەلى ءومىرىن شىعارماشىلىققا ارناعان ۇلت قايراتكەرى - ەل مەن جەر ماسەلەسىندە وزەكتى ويىن ايتىپ جۇرگەن دارا تۇلعا. وتاندىق تەليەۆيزيا، راديو سالاسىندا ەتكەن ەڭبەگى ەرەن. شىعارماشىلىق كەشتە زامانداستارى مەن ادەبيەت الىپتارى ارنايى قوناق بولدى. قالا اكىمىنىڭ ورىنباسارى ارمان قىرىقبايەۆ اقىندى مەرەيتويىمەن قۇتتىقتاپ، ادەبيەت سالاسى مەن ەل دامۋىنا قوسقان ەڭبەگىن ەرەكشە اتاپ ءوتتى. قازاقى داستۇرگە ساي يىعىنا شاپان جاپتى.
«بۇكىل قازاق ەلىنىڭ تويى دەپ ويلايمىن، وسىنداي ازاماتتاردى قازاق حالقى الاقانىنا سالىپ ءوسىرۋ كەرەك. 80 جاسقا 80 قوسىلسىن. ولاي ايتا بەرەمىز عوي، ءبىراق 80 تۇيەلىك جۇكتى موينىنا سالىپ، كوتەرىپ، حالقىنىڭ الدىندا، ەلىنىڭ، ءتىلىنىڭ الدىندا ارى تازا»، – دەدى جازۋشى، دراماتۋرگ دۋلات يسابەكوۆ.
قازاق پوەزياسىندا دارا قولتاڭباسىمەن ايشىقتالعان جىر الىبىنىڭ ەسىمى ەلىمىزدە عانا ەمەس، شەت مەملەكەتتە دە اسا تانىمال. ونىڭ شىعارمالارى 25-تەن استام مەملەكەتتىڭ مەكتەپ ادەبيەتىنە ەندى. بۇعان دەيىن گەرمانيادا شاحانوۆ تۋرالى 400-دەي ماقالا شىقتى. جاپونيادا 6 ملن تيراجبەن شىعاتىن گازەتتە شىعارمالارى جاريالاندى. شىعارماشىلىق كەشتە اقىننىڭ سوزىنە جازىلعان اندەر شىرقالىپ، درامالىق قويىلىمدار كورسەتىلدى.
«مۇحاڭنىڭ وزىندىك ءستيلى، وزىندىك ءسوز قولدانىسى، قازاقتىڭ رۋحاني تەرەڭ بويلاپ جازادى. سوزدەرى ءماندى دە ماڭىزدى. سوندىقتان ول انگە كەلەدى. ءسوزى ماعىنالى بولسا، ءانى اۋەندى بولسا، ورىنداۋشى ۇلتجاندى بولسا، سوندا عانا ول ەل اراسىنا تارايدى»، – دەدى قازاقستاننىڭ ەڭبەك سىڭىرگەن قايراتكەرى اسىلى وسمان.