الماتى قالاسىندا مۇگەدەكتىگى بار ادامداردى قولداۋ جانە ولاردىڭ ەڭبەك نارىعىندا بەيىمدەلۋىن جەڭىلدەتۋ ماقساتىندا جاڭا «JOBCOACH» جوباسى ىسكە قوسىلدى.
بۇل تۋرالى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ مالىمدەدى، دەپ حابارلايدى aqshamnews.kz
JOBCOACH جوباسىنىڭ ماقساتى – مۇگەدەكتىگى بار ادامدارعا جۇمىس ورنىندا قولداۋ كورسەتۋ، بەيىمدەۋ جانە ولاردى ەڭبەك ەتۋگە ىنتالاندىرۋ. جوبا اياسىندا 2025 جىلى 300 ادامدى قامتۋ جوسپارلانعان. بۇل باستاما 2030 جىلعا دەيىن جالعاسادى دەپ كۇتىلۋدە.
الەۋمەتتىك قولداۋ شارالارى:
جەرگىلىكتى بيۋدجەتتەن مۇگەدەكتىگى بار ادامداردى قولداۋعا 15 ملرد تەڭگەدەن استام قارجى ءبولىندى.
41 مىڭنان استام ادام قاجەتتى تەحنيكالىق قۇرالدارمەن جانە وڭالتۋ قىزمەتتەرىمەن قامتاماسىز ەتىلدى.
قوسىمشا «ينۆاتاكسي» قىزمەتتەرى ۇسىنىلادى، بۇل قىزمەت مەملەكەتتىك الەۋمەتتىك تاپسىرىس نەگىزىندە 100 اۆتوكولىكپەن قامتاماسىز ەتىلەدى.
بۇل باستاما مۇمكىندىگى شەكتەۋلى جانداردىڭ ءومىر ساپاسىن جاقسارتىپ، ولاردى قوعامعا بەلسەندى ارالاسۋعا ىنتالاندىرۋعا باعىتتالعان ماڭىزدى قادام بولىپ تابىلادى. «JOBCOACH» جوباسى – قوعامداعى ينكليۋزيۆتىلىك پەن تەڭدىكتى ارتتىرۋ جولىنداعى ۇلكەن ۇلەس.