№ 208 مەكتەپ-گيمنازيا بازاسىندا ۇيىمداستىرىلعان ءىس-شاراعا جۇزگە جۋىق العاشقى اسكەري دايىندىق جانە باسقا پاندەردىڭ مۇعالىمدەرى قاتىستى، دەپ حابارلايدى aqshamnews.kz.
پەداگوگتاردى قولداۋعا ناۋرىزباي اۋدانى ءبىلىم ءبولىمىنىڭ باسشىسى سالتانات قۇسايىنوۆا، «جاس سارباز» «بالالار-جاسوسپىرىمدەر اسكەري-پاتريوتتىق قوزعالىسى» رقب الماتى فيليالىنىڭ جەتەكشىسى زاپاستاعى پودپولكوۆنيك مارات قاناتوۆ جانە الماتى قالاسى بويىنشا «تاۋلى قاراباق ارداگەرلەرى مەن مۇگەدەكتەرىنىڭ رەسپۋبليكالىق وداعى» رقب وكىلى ەرمەك شىڭعىسوۆ كەلدى.
الماتى قالاسى ناۋرىزباي اۋدانىنىڭ قورعانىس ىستەرى جونىندەگى باسقارماسى مەن ءبىلىم ءبولىمى ۇيىمداستىرعان ءىس-شارا دەسانتتىق-شابۋىلداۋ اسكەرلەرى اسكەري قىزمەتشىلەرىنىڭ قويان-قولتىق ۇرىس تاسىلدەرىن كورسەتۋىمەن باستالدى.
– ءبىز مۇنداي جارىستاردى جىل سايىن وتكىزىپ تۇرامىز. بۇل العاشقى اسكەري دايىندىق وقىتۋشىلارى اراسىندا پەداگوگيكالىق شەبەرلىكتى ارتتىرۋعا جانە تاجىريبە الماسۋعا ىقپال ەتەدى، – دەدى الماتى قالاسى ناۋرىزباي اۋدانى قورعانىس ىستەرى جونىندەگى باسقارماسىنىڭ تاربيە جانە يدەولوگيالىق جۇمىس ءبولىمىنىڭ باستىعى لەيتەنانت ماقسات ءاجىحانوۆ.
ەستافەتا اك-74 اۆتوماتىن تولىق بولشەكتەپ-جيناۋ، قارۋدىڭ وقجاتارىن وقۋ پاتروندارىمەن جابدىقتاۋ، جالپى اسكەري قورعانىس جيىنتىعىن كيۋ، پنيەۆماتيكالىق مىلتىقتان نىسانا كوزدەۋ جانە مەديسينالىق-سانيتارلىق دايىندىق تاپسىرمالارىنان تۇردى.
جارىس قورىتىندىسى بويىنشا ءبىرىنشى ورىندى راقىم سارسەنبين اتىنداعى № 192 جالپى ءبىلىم بەرەتىن مەكتەپ مۇعالىمدەرى، ەكىنشى ورىندى № 174 مەكتەپ-گيمنازيا كومانداسى يەلەندى. ءۇشىنشى ورىندى № 176 مەكتەپ-گيمنازياسى مەن № 187 جالپى ءبىلىم بەرەتىن مەكتەپ ءوزارا ءبولىستى.
جارىستىڭ جەڭىمپاز كومانداسى مەن جۇلدەگەرلەرى كۋبوكتارمەن، قۇرمەت گراموتالارىمەن جانە باعالى سىيلىقتارمەن ماراپاتتالدى.