تالايدى سان سوقتىرعان ءىس ونلاين فورماتتا ءوتىپ جاتىر.
قارجى پيراميداسى بويىنشا كۇدىكتىلەر سانى – 12 ادام. ولاردىڭ ىشىندە تانىمال بلوگەر مەيىرجان تورەبايەۆ پەن مەيىرحان شەرنيازوۆ بار. تاعى ءبىر بلوگەر ءازىمجان سايدبايەۆقا ىزدەۋ جاريالانعان. سوت وتىرىسىندا زارداپ شەككەندەر كەزەگىمەن سۇرالىپ جاتىر، دەپ حابارلايدى Almaty-akshamy.kz.
جابىرلەنۋشىلەردىڭ قارجى پيراميداسىنا سالعان قاراجاتى 1 ملن تەڭگەدەن باستاپ 10 ملن-نان اسادى. مىسالى، ەلديار يسمايلوۆ ەسىمدى زارداپ شەگۋشى Astexs.kz كومپانياسىنا 85 ملن تەڭگە سالعان. ونىڭ 39 ملن-نىن عانا قايتارىپ الىپتى. تاعى ءبىر زارداپ شەگۋشى نۇرلان ايداربەك ۇلى 163 ملن تەڭگە بەرىپ، ءبىر تيىنىن دا قايتارا الماعان. ۇيىمداسقان قىلمىس بويىنشا باستى كۇدىكتىلەر سالىمشىلارعا ايىنا 20%، جىلىنا 240% تابىس ۋادە ەتكەن. وسى قارجى پيراميدالارىنا الدانعانداردىڭ سانى 200 ادامنان اسادى.