بىلتىر 5 ادام قازا تاۋىپ، تاعى 297 ادام جاراقات العان.
الماتىدا موپەدتەردىڭ قاتىسۋىمەن 276 جول-كولىك وقيعاسى تىركەلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
جەرگىلىكتى پوليسيا قىزمەتى باسقارماسىنىڭ مالىمەتىنشە، وتكەن جىلى شاھار جولدارىندا موپەدتەردىڭ قاتىسۋىمەن 276 جول-كولىك وقيعاسى تىركەلىپ، سالدارىنان 5 ادام قازا تاۋىپ، تاعى 297 ادام جاراقات العان.
«راسىندا، الماتى قالاسىندا موپەدتەردىڭ، ەلەكتروساموكاتتاردىڭ جانە ميكروموبيلدى كولىكتىڭ باسقا دا تۇرلەرىنىڭ قوزعالىسىنا قاتىستى وتكىر ماسەلە بار. كوبىنەسە بۇل كولىك تۇرلەرىن باسقاراتىن تۇلعالار ق ر جول قوزعالىسى ەرەجەلەرىن بۇزادى، ءسويتىپ، باسقا جول پايدالانۋشىلارى ءۇشىن ءقاۋىپ توندىرەدى. ستاتيستيكالىق مالىمەتتەرگە سۇيەنسەك، سوڭعى ايلاردا بالامالى كولىكتەردىڭ قاتىسۋىمەن بولعان جول-كولىك وقيعالارىنىڭ سانى ارتقان. ماسەلەن، وسى جىلدىڭ 3 ايىندا قالا جولدارىندا موپەدتەردىڭ قاتىسۋىمەن 62 جول-كولىك وقيعاسى تىركەلىپ، سونىڭ سالدارىنان 72 ادام ءتۇرلى دەنە جاراقاتتارىن العان. موپەد تىزگىندەگەن 38 ادام جول قوزعالىسى ەرەجەسىن بۇزعانى ءۇشىن اكىمشىلىك جاۋاپكەرشىلىككە تارتىلدى»، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى ماناپ ساتتاروۆ.
سپيكەردىڭ ايتۋىنشا، قازىرگى ۋاقىتتا الدىڭعى ساپتاعى پوليسيا بولىمشەلەرى، سكۋتەرلەر، موپەدتەر، ساموكاتتار جانە ۆەلوسيپەد جۇرگىزۋشىلەرىمەن بولاتىن جول-كولىك وقيعالارىن بارىنشا ازايتۋ ماقساتىندا ولاردىڭ قاتىسۋىمەن الدىن الۋ جۇمىستارىن كۇشەيتتى.
«ءبىز ەكى دوڭعالاقتى كولىك قۇرالدارىن جۇرگىزۋشىلەردى جاۋاپكەرشىلىك پەن جول ءتارتىبىن ارتتىرۋعا شاقىرامىز. زاڭعا سايكەس، قوزعالتقىش كولەمى 50 تەكشە مەتردەن جوعارى بولسا، وندا ول پوليسيادا قاراپايىم كولىك رەتىندە تىركەلىپ، جۇرگىزۋشى ءتيىستى ساناتتاعى قۇقىقتارعا يە بولۋى كەرەك. سونىمەن قاتار، موپەدتەر مەن سكۋتەرلەردىڭ جۇرگىزۋشىلەرىنە قوزعالىس كەزىندە قورعانىس قۇرالدارىن مىندەتتى تۇردە پايدالانۋىنا باسا نازار اۋدارامىز. جەدەل الدىن الۋ ءىس-شارالارى جالعاسۋدا»، – دەدى ماناپ ساتتاروۆ.