الماتى زووباعىنداعى مايمىل قاشىپ كەتپەك بولدى

شيمپانزە جۇگىرىپ كەلە جاتىپ كىشكەنتاي بالا وتىرعان قولاربانى يتەرىپ جىبەرگەن.

بۇگىن ساعات 16:21-دە الماتى حايۋاناتتار باعىندا كەلەڭسىز جاعداي ورىن الدى، دەپ حابارلايدى Almaty-akshamy.kz زووباقتىڭ ينستاگرامداعى پاراقشاسىنا سىلتەمە جاساپ.

«پريماتتار» بولىمىندەگى پاشا ەسىمدى شيمپانزە قىسقى قورشاۋدان جازعى قورشاۋعا اۋىستىرىلاتىن كەزدە، ارنايى تەمىر توردى بۇزىپ، ۆولەردەن سىرتقا شىعىپ كەتتى.

«ءوز اۋماعىنان بولەكتەنىپ قالعاندىقتان، سترەسستىك جاعدايعا ۇشىراعان شيمپانزە جۇگىرىپ كەلە جاتىپ زووباققا كەلۋشىلەردىڭ اراسىندا تۇرعان ايەل مەن كىشكەنتاي بالا وتىرعان قولاربانى يتەرىپ جىبەرگەن. بالا جاراقات العان. زووباق فەلدشەرى العاشقى مەديسينالىق كومەك كورسەتتى. ارتىنان جەدەل جاردەم شاقىرىلدى. ءقازىر بالانىڭ دەنساۋلىعىنا ءقاۋىپ ءتونىپ تۇرعان جوق. زووتەحنيكتەر مەن ۆەتەرينارلار جاعدايدى رەتتەپ، شيمپانزەنى ۆولەرگە كىرگىزدى. زووباق باسشىلىعى مەن قىزمەتكەرلەرى زارداپ شەككەن بالانىڭ اتا-اناسىمەن ۇنەمى بايلانىستا بولادى جانە قاجەتتى مەديسينالىق كومەك كورسەتۋگە دايىن»، - دەلىنگەن زووباق اكىمشىلىگى تاراتقان اقپاراتتا.

حايۋاناتتار باعىندا جانۋارلاردىڭ قاشۋى سيرەك ورىن الاتىن جاعداي ەمەس. مۇنداي ورىن العان وقيعالاردىڭ سوڭى قايعىلى جاعدايلارعا ۇلاسىپ جاتادى. مامانداردىڭ جەدەل قيمىلىنىڭ ارقاسىندا اۋىر جاعداي ورىن العان جوق.

.