پوليسيا دەپارتامەنتى رەيدتىك شارالاردى كۇشەيتپەك
الماتىدا 2 اي ىشىندە موپەد جۇرگىزۋشىلەرىنىڭ قاتىسۋىمەن 82 جول-كولىك وقيعاسى تىركەلدى. سالدارىنان 80-نەن اسا ادام زارداپ شەگىپ، ءارتۇرلى دەڭگەيدەگى دەنە جاراقاتىن الدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
الماتىدا كوكتەم كەلىسىمەن موپەد پەن موتوسيكل مىنۋشىلەردىڭ قاتارى كۇرت ارتادى. اسىرەسە، قوس دوڭگەلەكتى تاقىمداعاندار تاماق جەتكىزۋ قىزمەتىنىڭ كۋرەرلەرى. «ولار تاپسىرىس بەرۋشىلەرگە ىستىق استى تەز تاسىمالداۋ ءۇشىن كەيدە جىلدامدىقتى ارتتىرىپ، جول ەرەجەسىن ساقتامايدى» دەيدى تەمىر تۇلپار جۇرگىزۋشىلەرى. وعان قوسا، موپەدكە وتىرعانداردىڭ جۇرگىزۋشى كۋالىگى جوق.
«جول ەرەجەسىن ساقتامايدى. باعدارشامدا كولىكتەردىڭ اراسىنان ءوتىپ، جول-كولىك اپاتىنا سەبەپ بولادى. اقشا تاۋىپ ءجۇر، ءبارىن تۇسىنەمىز. ءبىراق ادامگەرشىلىكتى ساقتاۋ كەرەك قوي»، – دەدى قالا تۇرعىنى ازامات ناۋرىزبايەۆ
ال تاڭنان كەشكە دەيىن، اۋا-رايىنىڭ قولايسىزدىعىنا قاراماستان اۋىر ەڭبەك ەتەمىز دەگەن موپەد تىزگىندەگەن كۋرەرلەردىڭ ءوز شىندىعى بار. ولاردىڭ ايتۋىنشا، جەڭىل كولىكتەر جول بەرمەيدى
«موپەدتەر جول ەرەجەسىن ساقتاۋعا تىرىسادى. جەڭىل كولىكتەر جول بەرمەي، قىسىپ كەتەدى»، – دەدى كۋرەر زيات مۇحامەدجان
«كوز الدىمدا بىرنەشە جول اپاتى بولدى. ەكەۋى دە بايقاماي قالادى»، – دەدى كۋرەر قۋانىش جەكسەن.
ال قالالىق پوليسيا دەپارتامەنتى كۇننىڭ جىلىنۋىنا بايلانىستى رەيدتىك شارالاردى كۇشەيتپەك. وكىنىشتىسى، موپەد پەن ەلەكترلى ساموكات مىنگەندەرگە ءتارتىپ ساقشىلارى ەشتەڭە ىستەي المايدى. ويتكەنى، ول كولىك قۇرالى ەسەبىندە جوق.
«بىرىنشىدەن، بۇل – پروفيلاكتيكالىق تۇرعىسىنداعى رەيدتىك ءىس-شارالار، جول ءجۇرۋ پروسەسىنە قاتىسۋشىلاردىڭ بارلىعى، سونىڭ ىشىندە موپەد، ساموكات، ۆەلوسيپەدتەردىڭ جۇرگىزۋشىلەرى جول ءجۇرۋ ەرەجەسىن قاتاڭ ساقتاۋى ءتيىس. ويتكەنى، بۇل – ادامنىڭ ءومىرى، ادامنىڭ دەنساۋلىعى جانە قاۋىپسىزدىك ماسەلەسى. بۇل سۇراققا جالپىلاما جاۋاپ بەرۋدىڭ قاجەتى جوق. ءار جول ءجۇرۋ پروسەسىنە قاتىسۋشى ءوزىنىڭ جاۋاپكەرشىلىگىن سەزىنۋى كەرەك»، – دەدى الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك.
«جىل سايىن موپەدكە وتىرعانداردىڭ سانى ارتىپ جاتىر. جىل مەزگىلىنە قاراماي پايدالانادى. ۆەلوسيپەدتەن تەز جۇرەتىن كولىكتىڭ بارلىعىن ەسەپكە الۋ كەرەك. ولاردا دا كولىك جۇرگىزەتىنىن راستايتىن قۇجاتى بولۋى قاجەت. بۇل ايتارلىقتاي جاۋاپكەرشىلىكتى ارتتىرادى»، – دەدى ساراپشى الەكسەي الەكسەيەۆ
دەگەنمەن، ءىىم موپەد پەن ەلەكتروساموكاتتى كولىك قۇرالى قاتارىنا قوسۋ تۋرالى پارلامەنت ماجىلىسىنە زاڭ جوباسىن ۇسىنعان بولاتىن. ەندى جاڭا سايلانعان پارلامەنت ءماجىلىسىنىڭ دەپۋتاتتارى زاڭ جوباسىن قاراستىرادى. ياعني، موپەد كولىك قۇرالى بولىپ تانىلعان سوڭ عانا، جول ەرەجەسىن رەتتەۋگە مۇمكىندىك بار.