الماتىدا جىل باسىنان بەرى ەكولوگيالىق نورمالاردى بۇزۋ بويىنشا 7700-دەن استام دەرەك انىقتالدى.
سونىمەن قاتار الماتىدا 19 جاڭا ۇلگىدەگى ستاسيونارلىق تابيعاتتى قورعاۋ بەكەتى جۇمىسىن جالعاستىرۋدا، دەپ حابارلايدى aqshamnews.kz Polisia.kz-كە سىلتەمە جاساپ.
بۇل بەكەتتەردە پاترۋلدىك پوليسيا پولكىنىڭ ينسپەكتورلارى مەن ەكولوگتار ارنايى قۇرىلعىلار ارقىلى كولىكتەردەن شىققان ءتۇتىن دەڭگەيىن باقىلايدى. ستاسيونارلىق بەكەتتەردەن بولەك، وتكەن جىلدان باستاپ قالادا ناقتى ۋاقىت رەجيمىندە كولىكتەردىڭ شىعارىندىلارىن باقىلايتىن جىلجىمالى ەكوپاترۋلدەر جۇمىس ىستەيدى. بۇل پاترۋلدەر تەك بەكەتتەردە عانا ەمەس، كولىك اعىنىندا دا ءتارتىپ بۇزۋشىلاردى انىقتاپ، جەدەل شارالار قابىلداۋعا مۇمكىندىك بەرەدى.
- ەكوپاترۋلدەردىڭ جۇمىسى قالاداعى ەكولوگيالىق جاعدايدى جاقسارتۋ جولىنداعى ماڭىزدى قادام بولىپ تابىلادى. ءبىز اۋانىڭ لاستانۋىن ازايتۋ ماقساتىندا شىعارىندىلاردى باقىلاۋدى كۇشەيتتىك. ءبىزدىڭ مىندەتىمىز – زاڭ بۇزۋشىلىقتاردى انىقتاۋ عانا ەمەس، سونداي-اق جۇرگىزۋشىلەردە قالا ەكولوگياسىنا جاۋاپكەرشىلىكپەن قاراۋدى قالىپتاستىرۋ، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
شۋمايەۆتىڭ ايتۋىنشا، جىل باسىنان بەرى تابيعاتتى قورعاۋ بەكەتتەرى مەن ەكولوگيالىق پاترۋلدەردە 7 704 زاڭ بۇزۋشىلىق انىقتالدى. سونىمەن قاتار 2025 جىلدىڭ 13 ناۋرىزىنداعى جاعداي بويىنشا زاڭناماعا وزگەرىستەر ەنگىزىلگەنىن اتاپ ءوتتى: ەندى زياندى شىعارىندىلار نورمالارىن بۇزۋ ەسكەرتۋمەن شەكتەلمەيدى، وعان 10 اەك كولەمىندە ايىپپۇل قاراستىرىلعان.