كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا «ميترال جەتكىلىكسىزدىگىن ترانسكاتەتەرلىك ەمدەۋدىڭ زاماناۋي تاسىلدەرى. Dragonfly™» تاقىرىبىندا ماستەر-كلاسس ۇيىمداستىرىلدى.
ءىس-شارا اياسىندا ينستيتۋتتىڭ ينتەرۆەنسيالىق كارديولوگتارى حالىقارالىق ساراپشىلارمەن بىرلەسىپ، جوعارى حيرۋرگيالىق ءقاۋىپى بار 71 جاستاعى پاسيەنتكە ءساتتى وپەراسيا جاسادى. پاسيەنتتە ايقىن ميترال جەتكىلىكسىزدىگىمەن قاتار، كەرنەۋ ستەنوكاردياسى، I دارەجەلى ارتەريالىق گيپەرتونيا، ينسۋلينگە تاۋەلدى قانت ديابەتى جانە ديابەتتىك پولينيەۆروپاتيا سياقتى قوسالقى اۋرۋلار بولعان.
بۇعان دەيىن پاسيەنت ميوكارد ينفاركتىسىن وتكەرگەن. ونى جۇرەك سوعىسىنىڭ جيىلەۋى، ەنتىگۋ، اياقتىڭ ءىسىنۋى، جالپى السىزدىك پەن تەز شارشاۋ مازالاعان.
وپەراسيا ميترال قاقپاقشانى ترانسكاتەتەرلىك قالپىنا كەلتىرۋگە ارنالعان Dragonfly™ يننوۆاسيالىق جۇيەسىن قولدانۋ ارقىلى جۇرگىزىلدى. بۇل — قىتايدا ازىرلەنگەن جانە TEER (Transcatheter Edge-to-Edge Repair) تەحنولوگياسىنا نەگىزدەلگەن العاشقى قۇرىلعى. اتالعان ءادىس ميترال جەتكىلىكسىزدىگىن ەمدەۋدىڭ ەڭ كلينيكالىق تۇرعىدا زەرتتەلگەن جانە حالىقارالىق دەڭگەيدە مويىندالعان ينتەرۆەنسيالىق تاسىلدەرىنىڭ ءبىرى سانالادى.
كارديولوگيا جانە ىشكى اۋرۋلار عزي باسقارما ءتوراعاسى رۇستەم تولەۋتايەۆتىڭ ايتۋىنشا، بۇل تەحنولوگيا «اشىق» وپەراسياعا قارسى كورسەتىلىمى بار، قوسالقى اۋرۋلارى كوپ پاسيەنتتەردى ەمدەۋدە جەتەكشى ەۋروپالىق كلينيكالاردا ءوزىنىڭ تيىمدىلىگىن دالەلدەگەن.
رەنتگەنەندوۆاسكۋليارلىق وپەراسيالىق بلوكتىڭ مەڭگەرۋشىسى الەكسەي كولەسنيكوۆ TEER تەراپياسى جوعارى حيرۋرگيالىق ءقاۋىپى بار پاسيەنتتەردە ميترال قاقپاقشاسىنىڭ قىزمەتىن قالپىنا كەلتىرۋدىڭ حالىقارالىق ستاندارتى ەكەنىن اتاپ ءوتتى.
Dragonfly™ جۇيەسىن قولدانۋ قازاقستاندا ينتەرۆەنسيالىق كارديولوگيانى دامىتۋعا جانە ميترال جەتكىلىكسىزدىگىن ەمدەۋدىڭ ەڭ از ءينۆازيۆتى ادىستەرىنىڭ قولجەتىمدىلىگىن ارتتىرۋعا جاڭا مۇمكىندىكتەر اشادى.
وپەراسيا ءساتتى ءوتتى. قازىرگى تاڭدا پاسيەنتتىڭ جاعدايى تۇراقتى، ءوزىن جاقسى سەزىنەدى.