بوستاندىق اۋدانىندا ورنالاسقان اتالعان تۇرعىن ءۇي كەشەنىنىڭ اينالاسىنداعى جەر داۋى ەكى جىل بۇرىن باستالعان.
جەتى قاباتتى سەگىز تۇرعىن ءۇي كەشەنىندەگى مىڭنان استام تۇرعىننىڭ باسپاناسىز قالۋ ءقاۋپى بار، دەپ حابارلايدى Almaty-akshamy.kz Vecher.kz-كە سىلتەمە جاساپ.
وسى ماسەلە تۋرالى شاعىمدانعان تۇرعىنداردىڭ سوزىنشە، بۇل كوپ قاباتتى ۇيلەر 2016 جىلى پايدالانۋعا بەرىلگەن. قۇرىلىستى ءبىر كەزدەرى Qazkom بانكىنەن نەسيە العان «ميراس پارك» ج ش س سالعان.
«بۇل بانك «حالىق بانكىمەن» بىرىككەن كەزدە، قۇرىلىس سالۋشىنىڭ قارىزدارى عانا ەمەس، بارلىق اكتيۆتەرى دە سول بانكتىڭ يەلىگىنە ءوتتى. قۇرىلىس سالۋشىنىڭ قارىزى ءۇشىن تۇرعىن ءۇي كەشەنىندەگى ساتىلماعان پاتەرلەر مەن تۇرعىن ءۇي كەشەنى ورنالاسقان جەر تەلىمدەرىن الىپ قويعان قارجى ۇيىمى جەر تەلىمدەرىن، زاڭ تالابىنا سايكەس، تۇرعىندارعا بىرىكتىرىپ بەرمەگەن. بانك وسى اۋماقتا تۇرعىن ءۇي كەشەنى مەن تۇرعىن ۇيلەرگە «جان بەرەتىن» ينفراقۇرىلىم مەن ينجەنەرلىك جەلىلەردىڭ سالىنىپ قويعانىنا قاراماستان، جەر تەلىمدەرىن ساتا باستادى»، - دەيدى «ميراس پارك» تۇرعىن ءۇي كەشەنى تۇرعىندارىنىڭ ءبىرى انتون ۆيتاليەۆيچ.
بۇل جەردەگى اڭگىمە توعىز جەر تەلىمى تۋرالى، بۇل دەگەنىمىز التى گەكتاردان استام اۋماق. جەرگىلىكتى تۇرعىنداردىڭ تۇسىندىرۋىنشە، كەيىننەن بىرگە پايدالانۋ ماقساتىندا راسىمدەلگەن جەردى قۇرىلىس سالۋشى بولەك-بولەك تەلىم تۇرىندە ساتىپ العان، ول ايماققا كوپ پاتەرلى ۇيلەر سالىنعانىمەن، قۇرىلىس يەسى جەر تەلىمدەرىن بىرىكتىرۋدى ويلاماعان.
«ۇرىمتال ءساتتى ۇتىمدى پايدالانعان حالىق بانكى 2020 جىلى جەكە سوت ورىنداۋشىسى ارقىلى جەر تەلىمدەرىنىڭ ءبىرىن تاستانبەكوۆ دەگەن ازاماتقا ساتىپ جىبەرگەن، سونىڭ كەسىرىنەن ءبىز بۇل اۋماقتىڭ ءبىر بولىگىنەن ايىرىلىپ قالدىق»، - دەيدى تۇرعىن ءۇي كەشەنىنىڭ تاعى ءبىر تۇرعىنى گۇلۆيرا امانقوس قىزى.
ونىڭ ايتۋىنشا، جەر تەلىمىنىڭ جاڭا قوجايىنى پاتەر يەلەرىنەن تۇرعىن ءۇي كەشەنىنىڭ قورشاۋىن بۇزۋدى تالاپ ەتە باستاعان. ع. تاستانبەكوۆ تۇرعىن ءۇي كەشەنىنىڭ الدىنداعى ساتىپ العان جەرىنە تاۋنحاۋس سالۋدى كوزدەپ وتىر.
ەكى جىلعا سوزىلعان سوت پروسەسىندە «ميراس پارك» تۇرعىن ءۇي كەشەنىنىڭ تۇرعىندارى ءوز پاتەرىندە، ءوز اۋماعىندا تۇرۋ مەن مەنشىگىن ساقتاپ قالۋ ءۇشىن كۇرەسۋگە ءماجبۇر بولعان.
2021 جىلى ولار «الماتى قالاسىنىڭ قالالىق جوسپارلاۋ جانە ۋربانيستيكا باسقارماسى» كمم-نەن تاستانبەكوۆتىڭ ءوتىنىشى تۋرالى اقپارات بەرۋدى سۇراپ، جازباشا جاۋاپ العان. وندا بىلاي دەلىنگەن:
«جەر تەلىمى م-1 كانالىنىڭ سۋ قورعاۋ ايماعىندا، قۇدىقتارى بار ينجەنەرلىك جەلىلەردە جانە ارنايى جاسىل جەلەك ايماعىندا ورنالاسقاندىقتان، ع.س. تاستانبەكوۆكە نىساننىڭ ساۋلەت-جوسپارلاۋ تاپسىرماسى بەرىلمەگەن، ويتكەنى ول جەردە قۇرىلىس جۇمىستارىن جۇرگىزۋ قاراستىرىلماعان. ءقازىر جەر تەلىمى بەلگىلەنگەن ماقساتى بويىنشا ياعني «ميراس پاركى» مكك ءۇشىن پايدالانىلۋدا، ويتكەنى قۇرىلىس بارىسىندا كورسەتىلگەن جەر تەلىمىنىڭ استىنا بارلىق ينجەنەرلىك كوممۋنيكاسيالار جوبالىق قۇجاتتاماعا سايكەس جۇرگىزىلدى. مۇنىڭ ۇستىنە كەز كەلگەن نىساندى سالۋ قازاقستان رەسپۋبليكاسىنىڭ ساۋلەت، قالا قۇرىلىسى جانە قۇرىلىس قىزمەتى تۋرالى زاڭناماسىنىڭ تالاپتارىنا قايشى كەلەدى جانە قاتاڭ تىيىم سالىنادى. تالاپكەردىڭ شاعىمدانۋشىلارعا قورشاۋدى بۇز دەۋى دە نەگىزسىز».
باسقارۋشى كومپانيا مەن قۇرىلىس سالۋشىنى جاۋاپكەر رەتىندە كورسەتكەن عالىمجان تاستانبەكوۆ الدىمەن اۋداندىق سوتقا، كەيىننەن قالالىق سوتقا شاعىمدانعان. تالاپ ارىزى قاناعاتتاندىرىلماعاندىقتان، ول جوعارعى سوتقا شاعىمدانعان.
«FM Group» ج ش س قورشاۋ سالىپ تاستاعاندىقتان، تالاپكەر مەنشىك يەسى رەتىندە ءوز جەرىن پايدالانا الماي وتىرعانىن ايتادى. الماتى قالاسى بوستاندىق اۋداندىق سوتىنىڭ 2022 جىلعى 29 ناۋرىزداعى شەشىمى تالاپ ارىزدى قاناعاتتاندىرۋسىز قالدىردى. الماتى قالالىق سوتىنىڭ ازاماتتىق ىستەر جونىندەگى سوت القاسىنىڭ 2022 جىلعى 1 شىلدەدەگى قاۋلىسىمەن اۋداندىق سوتتىڭ شەشىمى وزگەرىسسىز قالدىرىلدى»، - دەلىنگەن تۇرعىندار بىزگە كورسەتكەن جوعارعى سوتتىڭ 2022 جىلعى 6 اقپانداعى ۇيعارىمىندا.
سونداي-اق سوت شەشىمى بويىنشا، تۇتاس قورشاۋدىڭ ءبىر اۋماق بولىپ ەسەپتەلەتىنى، ونى كۇتىپ ۇستاۋ پاتەر يەلەرىنىڭ قاراجاتى ەسەبىنەن جۇزەگە اسىرىلاتىنى ايتىلعان.
سونىمەن قاتار، جەرگىلىكتى سوتتار اىجك-نىڭ 72-بابىنىڭ تالاپتارىن ەسكەرە وتىرىپ، تالاپكەردىڭ وزىنە تيەسىلى جەر ۋچاسكەسىن جاۋاپكەرلەردىڭ يەلەنەتىنى تۋرالى دالەلدى ايعاق ۇسىنباعانىن اتاپ كورسەتتى.
سوت شەشىمدەرىمەن كەلىسپەگەن ع. تاستانبەكوۆ جوعارعى سوتقا سوت اكتىسىن كاسساسيالىق تارتىپتە قايتا قاراۋ تۋرالى ءوتىنىشحات بەردى. سوت تىڭداۋى 28 اقپاندا ءوتتى.
ءدال قازىرگى ۋاقىتتا «ميراس پارك» تۇرعىن ءۇي كەشەنى تۇرعىندارىنىڭ ايتۋىنشا، بۇل جاعدايعا جاۋاپتى «حالىق بانكى» تۇرعىن ءۇي كەشەنىنىڭ اۋماعىنان جەر تەلىمدەرىن ءبولىپ الىپ، ساتۋعا شىعارىپ وتىر...
ساراپشى پىكىرى
«الماتى» پيك قاۋىمداستىعىنىڭ ءتوراعاسى اركاديي رۋبسوۆ:
«كوپ پاتەرلى تۇرعىن ءۇيدى نەمەسە باسقا نىساندى سالۋ، پايدالانۋ، كۇتىپ-ۇستاۋ ءۇشىن قاجەتتى جەر ۋچاسكەسى كوندومينيۋم وبەكتىسىنىڭ قۇرامىنا كىرەتىن ءۇي-جايلاردىڭ مەنشىك يەلەرىنىڭ ورتاق ۇلەستىك مەنشىگىنە بەرىلۋى ءتيىس. ورتاق ۇلەستiك مەنشiك نەمەسە جەردى پايدالانۋ قۇقىعى iرگەلەس جەر ۋچاسكەسiنە، ياعني كوپ پاتەرلi تۇرعىن ءۇيدiڭ اينالاسىن كوركەيتۋگە، كوگالداندىرۋعا، سپورت، بالالار الاڭدارىن، كiرمە جولداردى، اۆتوتۇراقتار، تروتۋارلار، شاعىن ساۋلەت نىساندارىن ورنالاستىرۋعا ارنالعان اۋماققا دا تيەسىلى. سونىمەن قاتار، ەگەر كوپ پاتەرلى تۇرعىن ءۇيدىڭ ينجەنەرلىك ينفراقۇرىلىمى جەر ۋچاسكەسىندە ورنالاسقان بولسا، ياعني كوممۋنيكاسيالار مەن ينجەنەرلىك جەلىلەر بولسا، مۇنداي جەر ۋچاسكەسىن قۇرىلىس سالۋشى ساتىپ السا، جوبالىق قۇجاتتاماسىن ازىرلەۋ كەزىندە كوپ پاتەرلى تۇرعىن ءۇي سالىناتىنى ەسكەرىلگەن بولسا، وندا قۇرىلىس سالۋشى جوبالىق قۇجاتتامادا كورسەتىلگەن جەر ۋچاسكەلەرىن ءسوزسىز بىرىكتىرۋى كەرەك. جاڭادان پايدا بولعان جەر ۋچاسكەسى كوندومينيۋمنىڭ مەنشىگى سانالادى. ەگەر قۇرىلىس سالۋشى ارسىزدىقپەن كوپپاتەرلى ءۇيدىڭ اۋماعىنداعى جەكە جەر ۋچاسكەسىن ساتۋعا ارەكەتتەنسە، وندا بۇل قايتالاپ ساتۋ جانە پاتەر يەلەرىنىڭ مۇلكى ەسەبىنەن بايۋ رەتىندە قاراستىرىلۋى مۇمكىن.»