الماتىدا مەرەكەلىك ۆەلوشەرۋ ءوتتى

سپورتتىق شاراعا مىڭنان اسا ادام قاتىستى

جاپپاي ۆەلوشەرۋ قازاقستان حالقىنىڭ بىرلىك كۇنىنە ارنالدى، دەپ حابارلايدى Almaty-akshamy.kz Vecher.kz-كە سىلتەمە جاساپ. 

ۆەلوماۋسىم مەن ۆەلوشەرۋدىڭ سالتاناتتى اشىلۋىنا الماتى اكىمىنىڭ ورىنباسارى ارمان قىرىقبايەۆ قاتىستى. جيىن بارىسىندا ول تۇرعىندار ۆەلوسيپەدتى ءجيى قولدانا باستاعانىن جانە ۆەلوجولاقتار جىل وتكەن سايىن كوبەيىپ جاتقانىن جەتكىزدى. 

«قىس بىتكەن سوڭ قالادا ۆەلوشەرۋلەر جاندانا باستايدى، بۇل وتە جاقسى. قاتىسۋشىلاردىڭ قاتارىندا كاسىبي ۆەلوسپورتشىلارمەن قاتار قاراپايىم ادامدار مەن ۆەلوسيپەدتى ەندى ۇيرەنىپ جۇرگەندەر دە بار. ولار از قاشىقتىقتى ءجۇرىپ وتەدى. ال، ءبىز ءوز كوماندامىز اتىنان ولارعا شاعىن كادەسىيلاردى تابىستايمىز»،- دەدى ق ر پارلامەنتى ءماجىلىسىنىڭ دەپۋتاتى اندرەي ليننيك. 

ۆەلوشەرۋگە قاتىسقان مىڭداعان الماتىلىق ءال-فارابي داڭعىلى بويىمەن سەگىز شاقىرىمدى قاشىقتىقتى ءجۇرىپ ءوتتى. 

قازاقستان ۆەلوسپورت فەدەراسياسىنىڭ پرەزيدەنتى نۇرلان سماعۇلوۆتىڭ ايتۋىنشا، بارلىعىنا مارە سىزىعىن ءبىرىنشى بولىپ كەسىپ ءوتۋ مىندەتتى ەمەس، باستىسى قاشىقتىقتى ءجۇرىپ ءوتۋ جانە مەرەكەلىك كوڭىل-كۇيدى سەزىنۋ. سونداي-اق ول ۆەلوشەرۋ - دوستىقتىڭ مارافونى ەكەنىن ءارى الماتىلىقتاردىڭ ىنتىماعى ەكەنىن اتاپ ءوتتى. 

ۆەلوشەرۋگە قاتىسۋشىلار دا ءوز اسەرلەرىمەن ءبولىستى، ونىڭ ءبىرى اناستاسيا كيرەيەۆا. 

«قۇربىم ەكەۋىمىز ۆەلوشەرۋ جايلى بىلگەندە قاتىسۋدى ءجون كوردىك. ءبىراق بىزدە ۆەلوسيپەد بولمادى، سوندىقتان جالعا الدىق. ءبىز كوبىندە جۇگىرەمىز، ۆەلوشەرۋگە ءبىرىنشى رەت قاتىستىق، بىزگە ۇنادى. ۇيىمداستىرۋى دا جاقسى، مەرەكەلىك جانە سپورتتىق كوڭىل-كۇيدى سەزىندىك»،-دەيدى ول.