الماتىدا «مەرەيلى وتباسى» ۇلتتىق كونكۋرسىنىڭ قالالىق كەزەڭى جەڭىمپازدارىن سالتاناتتى ماراپاتتاۋ ءراسىمى ءوتتى.
سوڭعى جىلدارى ەلىمىزدە وتباسىلىق قۇندىلىقتاردى مەملەكەتتىك دەڭگەيدە جانداندىرىپ، ۇلگىلى وتباسىلاردى ناسيحاتتاۋ جۇمىستارى قولعا الىندى. وسى ماقساتتا 2013 جىلى قىركۇيەك ايىنىڭ ەكىنشى جەكسەنبىسى وتباسى كۇنى بولىپ بەلگىلەنىپ، 2014 جىلدان باستاپ «مەرەيلى وتباسى» ۇلتتىق كونكۋرس باستاۋ الدى، دەپ حابارلايدى Almaty-akshamy.kz.
قوعام نازارىن وتباسىلىق قۇندىلىقتاردى ساقتاۋعا اۋدارۋ ءارى ونى دارىپتەۋ ماقساتىندا ەلىمىزدە ءار جىل سايىن «مەرەيلى وتباسى» ۇلتتىق كونكۋرسىن وتكىزۋ داستۇرگە اينالدى.
«مەرەيلى وتباسى» ۇلتتىق كونكۋرسى جىل سايىنعى ءداستۇر بويىنشا حالىقارالىق وتباسى كۇنىنە وراي 15 مامىردا باستاۋ العان بولاتىن.
بۇل رەتتە، «مەرەيلى وتباسى» ۇلتتىق كونكۋرسىن الماتى قالاسىندا ۇيىمداستىرۋ ماقساتىندا قالالىق كوميسسيانىڭ قۇرامى بەكىتىلدى.
كوميسسيا قۇرامىنا قالا اكىمى مەن قالا اكىمىنىڭ ورىنباسارى، قوعامدىق دامۋ، مادەنيەت، جاستار ساياساتى، جۇمىسپەن قامتۋ جانە الەۋمەتتىك باعدارلامالار باسقارما باسشىلارى، الماتى قالاسى اكىمىنىڭ اپپاراتى الەۋمەتتىك دامۋ ءبولىمىنىڭ باس ينسپەكتورى – الماتى قالاسى اكىمىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ حاتشىسى، ۇكىمەتتىك ەمەس ۇيىمداردىڭ وكىلدەرى، ءماسليحات دەپۋتاتى، الماتى قالاسى قوعامدىق كەڭەسىنىڭ مۇشەسى، سونىمەن قاتار، كونكۋرستىڭ وتكەن جىلعى جەڭىمپازى دا ەندى.
«مەرەيلى وتباسى» كونكۋرسى، ەڭ الدىمەن ادامگەرشىلىك مۇراتتاردى جاڭعىرتۋعا، وتباسى مەن نەكەنىڭ مارتەبەسىن كوتەرۋگە، اتا-انانىڭ بالا تاربيەسىندەگى جاۋاپكەرشىلىگىن ارتتىرۋعا، وتباسىلىق قۇندىلىقتار مەن وتباسىنىڭ جاعىمدى ءيميدجىن قالىپتاستىرۋعا جانە كەڭىنەن ناسيحاتتاۋعا باعىتتالعان.
«الماتى قالاسىندا ءداستۇرلى «مەرەيلى وتباسى» ۇلتتىق كونكۋرسىنا مامىر-شىلدە ارالىعىندا وتىنىمدەر قابىلداندى. شىلدەنىڭ 1-10 ارالىعىندا اۋداندىق كوميسسيا قۇرامى وتىنىمدەردى قاراپ، ۇزدىك شىققان 2 وتباسىنى قالالىق كوميسسيانىڭ قاراۋىنا جىبەردى. 14 شىلدەدە «مەرەيلى وتباسى» ۇلتتىق كونكۋرسىنىڭ الماتى قالاسى بويىنشا جەڭىمپازداردى انىقتاۋ جونىندەگى كوميسسياسىنىڭ وتىرىسى ءوتتى. قالانىڭ 200-دەن اسا وتباسى كونكۋرسقا قاتىسۋعا نيەت بىلدىرگەن.
كوميسسيا قالالىق كەزەڭگە اۋدانداردان 8 وتباسىن جانە ولاردىڭ اراسىنان 1 وتباسىن الماتى قالاسى اتىنان رەسپۋبليكالىق كەزەڭگە قاتىسۋعا تاڭدادى. بۇگىن وسى مەرەكەگە قاتىسقان وتباسىلاردىڭ وكىلدەرى ءوز ومىرلەرىن بولاشاق ۇرپاقتى تاربيەلەۋگە، وتباسىلىق بايلانىستاردى نىعايتۋعا ارنادى. ولاردىڭ جۇرەكتەرى تۋىستارى مەن جاقىندارىنا، ءوز وتانىنا دەگەن سۇيىسپەنشىلىككە تولى. ءار وتباسى ءوز شەجىرەسىن دايىنداپ، بەينەباياندا ولار ءوز تاريحىن، جەتىستىكتەرىن ايتىپ بەردى.»، - دەيدى ۇيىمداستىرۋشى حالىقارالىق «جاناشىر» قوعامدىق قورىنىڭ پرەزيدەنتى جاڭىل اپەتوۆا.
قالا ورتالىعىنداعى «باقىت» سالتانات سارايىندا وتكەن سالتاناتتى ماراپاتتاۋ راسىمىندە الماتى قالاسى قوعامدىق دامۋ باسقارماسى باسشىسىنىڭ ورىنباسارى بەكبەرگەنوۆ رەنات ورال ۇلى الماتىنىڭ 8 اۋدانىنان «مەرەيلى وتباسى» ۇلتتىق كونكۋرسىندا وزىق شىققان سەگىز وتباسىنا 300 000 (ءۇش ءجۇز مىڭ) تەڭگەنىڭ سەرتيفيكاتتارى مەن ديپلومدارىن تابىس ەتتى.
ق ر تۇڭعىش ەڭبەك ەرى، قازاقستاننىڭ ەڭبەك سىڭىرگەن قايراتكەرى، قازاقستان پەداگوگيكالىق عىلىمدار اكادەمياسىنىڭ اكادەميگى، الماتى قالاسىنىڭ قۇرمەتتى ازاماتى اياگۇل تورە قىزى ميرازوۆا كونكۋرستىڭ رەسپۋبليكالىق كەزەڭىنە وتكەن جەڭىمپاز سىبانبەكوۆتەر وتباسىنا 700 000 (جەتى ءجۇز مىڭ) تەڭگەنىڭ سەرتيفيكاتى مەن ديپلومىن تابىس ەتتى.
«جىل سايىن «مەرەيلى وتباسى» كونكۋرسىن وتكىزۋ – جاقسى ءداستۇر. وتە تولقىنىستى ءسات. ۋاقىتتى قىزىقتى وتكىزۋ مۇمكىندىگىن سىيلاعان ۇيىمداستىرۋشىلارعا راحمەت ايتقىم كەلەدى. بەرەكە-بىرلىگى جاراسقان، سانالى ۇرپاق تاربيەلەپ، ەل دەموگرافياسىنا ۇلەس قوسىپ وتىرعان وتباسىلاردى دارىپتەۋ كەرەك، وزگەلەرگە ۇلگى ەتۋ كەرەك. «ەل بولامىن دەسەڭ – بەسىگىڭدى تۇزە» دەيدى، وتباسى تاربيەسى وتە ماڭىزدى ماسەلە. ۇلى وتان سوعىسىنان ورالعان اكەم مەن انامىز ەكەۋى 8 بالاسىنا لايىقتى تاربيە بەردى. ۇرپاق ساباقتاستىعىن جالعاپ، ءبىز دە بالالارىمىزدى ەلگە قىزمەت ەتەتىن ازاماتتار ەتىپ تاربيەلەۋدەمىز»، - دەيدى كونكۋرسقا ناۋرىزباي اۋدانىنان قاتىسۋشى ارداق ماۋىتحان ۇلى سىدىق.
ءيا، ءار وتباسىنىڭ بوساعاسىنىڭ بەرىكتىگى – مەملەكەت ىرگەتاسىنىڭ كەمەلدىگىنىڭ كەپىلى بولماق. باقىتتى وتباسى - ۇيلەسىمدى قوعامنىڭ جانە مەملەكەتتىڭ سەنىمدى تىرەگىنىڭ باستى قۇرامداس بولىگى.
بيىل «مەرەيلى وتباسى» ۇلتتىق كونكۋرسىنا 10 جىل تولىپ وتىر. ءىس-شارا مەرەكەلىك كونسەرتپەن اياقتالدى.
«مەرەيلى وتباسى» ۇلتتىق كونكۋرسىن الماتى قالاسى قوعامدىق دامۋ باسقارماسىنىڭ قولداۋىمەن حالىقارالىق «جاناشىر» قوعامدىق قورى ۇيىمداستىردى.