الماتىدا تۇراتىن 826 جىلدىق ءوتىلى بار تەمىرجولشىلار اۋلەتى «مەرەيلى وتباسى» قالالىق بايقاۋىنىڭ جەڭىمپازى اتاندى
«مەرەيلى وتباسى» بايقاۋىنىڭ باستى ماقساتى – ادامگەرشىلىك مۇراتتارىن جاڭعىرتۋ، وتباسى مەن نەكەنى قۇرمەتتەۋگە تاربيەلەۋ، سونداي-اق وتباسىلىق قۇندىلىقتار مەن قازاقستاندىق وتباسىنىڭ وڭ ءيميدجىن كورسەتۋ جانە كەڭىنەن ناسيحاتتاۋ.
بيىل الماتىدا بايقاۋعا 235 وتباسى ءوتىنىم ءتۇستى. الدىمەن اۋداندىق ىرىكتەۋ، سودان كەيىن قالالىق ىرىكتەۋ كەزەڭدەرى وتكىزىلدى. تەمىرجولشىلار قاپىشيەۆتەر اۋلەتى جەڭىمپاز اتاندى. وتباسىندا ءۇش ۇرپاقتان 26 ادام قيىن دا كۇردەلى تەمىرجولشى ماماندىعىن تاڭداعان. ولاردىڭ بارلىعىنىڭ تەمىرجولداعى جالپى ەڭبەك ءوتىلى 826 جىل!
«ءبىز جەڭىستى كۇتكەن جوقپىز، ءبىراق ەرەكشە قۋاندىق. باسەكەلەستىك ۇلكەن بولدى. ەندى استانادا ءوز قالامىزدىڭ جانە تەمىرجولشىلار وتباسىمىزدىڭ نامىسىن قورعاۋ ءۇشىن مۇقيات دايىندالامىز. تەمىرجولعا دەگەن سۇيىسپەنشىلىك ءبىزدىڭ قانىمىزدا. وسىنىڭ ارقاسىندا ءبىز جەڭىسكە جەتتىك. ءبىز ءوز ماماندىعىمىزدى شىن جۇرەكتەن جاقسى كورەمىز»، - دەپ ءوز ويىمەن ءبولىستى ۇلكەن اۋلەتتىڭ ءارى وتباسىنىڭ باسشىسى مۇرات قاپىشيەۆ.
مۇراتتىڭ اكەسى تەمىرجولشى بولعان، ول 1932 جىلى وسى سالاعا كەلىپ، 1968 جىلى زەينەتكە شىققان. جۇبايىمەن بىرگە ولار سەگىز بالا تاربيەلەپ ءوسىردى. ولاردىڭ بارلىعى اكەسىنىڭ جولىن قۋىپ، تەمىرجول سالاسىندا جۇمىس ىستەدى. مۇرات قاپىشيەۆتىڭ ءۇش بالاسى بار جانە بارلىعى تەمىرجولدا جۇمىس ىستەيدى.
رەسپۋبليكالىق بايقاۋدىڭ فينالدىق كەزەڭى استانادا، قىركۇيەك ايىندا، وتباسى كۇنىن مەرەكەلەۋ اياسىندا وتەدى.