جىل سايىن 8 قاراشادا ستاتيستيكا ورگاندارىنىڭ قىزمەتكەرلەرى وزدەرىنىڭ كاسىبي مەرەكەسى – ستاتيستيكا كۇنىن اتاپ وتەدى.
بيىل قازاقستان ستاتيستيكاسىنا - 103 جىل. كاسىبي مەرەكە قارساڭىندا الماتىنىڭ وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگكە ق ر ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى دەپارتامەنتى باسشىسىنىڭ ورىنباسارى تالعات مۇحامەتقازييەۆ قاتىستى، دەپ حابارلايدى Almaty-akshamy.kz.
اتاپ وتەتىن جايت، مەرەكە كۇنى رەتىندە 8 قاراشانىڭ بەلگىلەنۋ سەبەبى: ءدال وسى كۇنى 1920 جىلى قازاق كسر-دە ستاتيستيكا قىزمەتى قۇرىلدى.
«مەملەكەتتىك ستاتيستيكا تۋرالى» قازاقستان رەسپۋبليكاسىنىڭ زاڭىنا سايكەس: ستاتيستيكالىق قىزمەت – وسى قىزمەتتى جوسپارلاۋدى، ستاتيستيكالىق ءادىسنامانى ازىرلەۋدى، ستاتيستيكالىق بايقاۋ جۇرگىزۋدى، العاشقى ستاتيستيكالىق جانە اكىمشىلىك دەرەكتەردى وڭدەۋدى، قورعاۋ مەن ساقتاۋدى، ستاتيستيكالىق اقپاراتتى قالىپتاستىرۋ مەن تاراتۋدى قامتيتىن پروسەسس.
«سوڭعى جىلدارى ءبىزدىڭ رەسپۋبليكامىزدا ستاتيستيكالىق مالىمەتتەرگە دەگەن قىزىعۋشىلىق ايتارلىقتاي ءوستى، ستاتيستيكالىق اقپاراتتى پايدالانۋشىلار شەڭبەرى تۇراقتى تۇردە كەڭەيىپ كەلەدى. بۇگىندە مەملەكەتتىك ورگاندار، قوعام قايراتكەرلەرى، ىسكەرتوپتار، عىلىمي قىزمەتكەرلەر، سونداي-اق ستۋدەنتتەر مەن وقۋشىلار قوعامدىق ءومىردىڭ ءارتۇرلى اسپەكتىلەرى تۋرالى وزەكتى جانە وبەكتيۆتى اقپارات الۋعا مۇددەلى»، - دەيدى تالعات مۇحامەتقازييەۆ.
مۇنداي اقپاراتتىڭ نەگىزگى كوزى مەملەكەتتىك ستاتيستيكا بولىپ تابىلادى، ونىڭ جۇمىسىنىڭ ماڭىزدى قاعيداتتارىنىڭ ءبىرى پايدالانۋشىلاردىڭ رەسمي ستاتيستيكالىق اقپاراتقا تەڭ قول جەتكىزۋىن قامتاماسىز ەتۋ بولىپ تابىلادى. قوعامنىڭ، مەملەكەتتىڭ جانە حالىقارالىق قوعامداستىقتىڭ وبەكتيۆتى ساپالى جانە وزەكتى ستاتيستيكالىق اقپاراتقا قاجەتتىلىكتەرىن قاناعاتتاندىرۋ دەپارتامەنت ءۇشىن ءبىرىنشى كەزەكتەگى مىندەت بولىپ تابىلادى.
جينالعان ستاتيستيكالىق دەرەكتەر مەملەكەتتىك شەشىمدەر قابىلداۋعا، بيزنەس شەشىمدەر قابىلداۋعا اسەر ەتەدى، ءبىز ەلدىڭ جانە الەمنىڭ ەكونوميكالىق جانە ساياسي قىزمەتىنىڭ قالاي دامىپ جاتقانىن، قازىرگى ادامزات قوعامىنىڭ قالاي دامىپ جاتقانىن بايقاي الامىز.
«ستاتيستيكالىق اقپاراتتى ءوندىرۋ ءۇشىن دەپارتامەنت 100 مىڭنان استام زاڭدى تۇلعالاردان، فيليالدار مەن وكىلدىكتەردەن، 235 مىڭ جەكە كاسىپكەرلەردەن، 13 مىڭ ءۇي شارۋاشىلىقتارىنان ستاتيستيكالىق دەرەكتەردى جيناۋدى جۇزەگە اسىرادى»، - دەپ جالعاستىردى ول.
رەسپوندەنتتەرگە جۇكتەمەنى تومەندەتۋ، رەسپوندەنتتەردىڭ قارجىلىق، ەڭبەك جانە ۋاقىت شىعىندارىن تومەندەتۋ، اكىمشىلىك كەدەرگىلەردى جويۋ، ەنگىزۋ كەزىندە قاتەلەر تاۋەكەلدەرىن ازايتۋ، باستاپقى دەرەكتەردى جەدەل جانە ساپالى جيناۋدى قامتاماسىز ەتۋ ماقساتىندا رەسپوندەنتتەرگە باستاپقى ستاتيستيكالىق دەرەكتەردى قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسىنىڭ stat.gov.kz رەسمي ينتەرنەت-رەسۋرسىندا ورنالاسقان «رەسپوندەنتتىڭ كابينەتى» ارقىلى جۇزەگە اسىرىلاتىن ونلاين رەجيمدە ەلەكتروندىق تۇردە ۇسىنۋ مۇمكىندىگى ۇسىنىلدى.
بۇل رەتتە، ستاتيستيكالىق نىسانداردى ۋاقتىلى ۇسىنباۋ، سونداي-اق ۇسىنباۋ اكىمشىلىك قۇقىق بۇزۋشىلىق بولىپ تابىلاتىنىن جانە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس جاۋاپتىلىققا اكەپ سوعاتىنىن اتاپ وتكەن ءجون.
2022 جىلدىڭ سوڭىندا ۇلتتىق ستاتيستيكا بيۋروسىنىڭ لوگوتيپى رەبرەندينگتەن ءوتىپ، stat.gov.kz سايتى جاڭارتىلعانىن اتاپ وتكىم كەلەدى. قازىرگى ۋاقىتتا پايدالانۋشىلار سايتتىڭ قىزىقتى، كوركەم، جۇمىس ىستەۋگە ىڭعايلى ەكەنىن اتاپ وتۋدە.
جاڭارتىلعان سايتتا جاس بۋحگالتەرلەر ءۇشىن «رەسپوندەنتتەرگە» باتىرماسىندا «ستاتيستيكالىق نىسانداردى تولتىرۋ بويىنشا ۆيدەو-نۇسقاۋلىقتار» جاڭا فۋنكسياسىن اتاپ وتۋگە بولادى.
سونىمەن قاتار، دەرەكتەرمەن جۇمىس ىستەۋ داعدىلارىن ارتتىرۋ ماقساتىندا Data Literacy باعدارلاماسى ىسكە قوسىلدى. باعدارلاما ستاتيستيكالىق ساۋاتتىلىقتى ارتتىرۋعا جانە دەرەكتەر نەگىزىندە شەشىم قابىلداۋ مادەنيەتىن ەنگىزۋگە باعىتتالعان جانە ستاتيستيكا سالاسى اۋديتورياسىنىڭ ۇنەمى حاباردار بولۋىنا مۇمكىندىك بەرەدى.