كەشكە ارنايى شاقىرىلعان مۇقاعالي ماقاتايەۆتىڭ بالالارى اقىن تۋرالى ەستەلىكتەرىمەن ءبولىستى
بۇگىن قازاق پوەزياسىنىڭ ءحانتاڭىرى مۇقاعالي ماقاتايەۆتىڭ تۋعانىنا 92 جىل. وسىعان وراي ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ الماتى قالاسى بويىنشا فيليالىندا مەملەكەتتىك قىزمەتشىلەر اراسىندا «جىرلايدى جۇرەك» ادەبي-جىر كەشى ۇيىمداستىرىلدى، دەپ حابارلايدى Almaty-akshamy.kz.
پوەزيا كەشىنە فيليالدا ءبىلىم الاتىن قايتا دايارلاۋ كۋرسىنىڭ جانە بىلىكتىلىكتى ارتتىرۋ سەمينارلارىنىڭ تىڭداۋشىلارى جانە ءبىرقتار مەملەكەتتىك ورگاننىڭ قىزمەتشىلەرى قاتىستى. اكادەميانىڭ الماتى قالاسى بويىنشا فيليالىنىڭ ديرەكتورى ايگەرىم ابيلوۆانىڭ ايتۋىنشا، ادەبي شارا مەملەكەتتىك قىزمەتشىلەر اراسىندا اقىننىڭ شىعارماشىلىعىن ناسيحاتتاۋ ماقساتىندا وتكەن.
«ءىس-شارا مەملەكەتتىك قىزمەتشىلەر اراسىندا اقىن شىعارمالارىن كەڭىنەن دارىپتەۋ ارقىلى ولاردىڭ قازاق حالقىنا، انا تىلىمىزگە، وتانعا دەگەن سۇيىسپەنشىلىك سەزىمدەرىن ودان ءارى دامىتىپ، رۋحاني قۇندىلىقتاردى ناسيحاتتاۋ ماقساتىندا ۇيىمداستىرىلدى. كەشكە ارنايى شاقىرىلعان مۇقاعالي ماقاتايەۆتىڭ بالالارى اقىن تۋرالى ەستەلىكتەرىمەن ءبولىستى. شىعارماشىلىعىن زەرتتەگەن ماماندار مۇزبالاق اقىننىڭ ەڭبەكتەرىنە عىلىمي-زەرتتەۋلەر تۇرعىسىنان جانە حالىقارالىق دەڭگەيدە دە جوعارى باعا بەرىلگەنىن ايتتى. سونىمەن قاتار پوەزيامەن اۋەستەنەتىن مەملەكەتتىك قىزمەتشىلەر وزدەرى جازعان شىعارمالارىمەن ءبولىسىپ، ونەرلى جاستار مەن بۇلدىرشىندەر ولەڭدەرىن وقىدى، ءداستۇرلى انشىلەر دومبىرامەن اندەرىن شىرقادى»، – دەدى فيليال ديرەكتورى.
پوەزيا كەشىنە ارنايى قوناق رەتىندە اقىننىڭ ۇلى جۇلدىز ماقاتايەۆ جانە مۇقاعالي ماقاتايەۆ اتىنداعى حالىقارالىق قوعامدىق قوردىڭ ءتورايىمى، كەلىنى باقىتگۇل ايداروۆا، الماتى قالاسى مادەنيەت باسقارماسىنىڭ مادەني-كوپشىلىك ءىس-شارالار ۇيىمداستىرۋ ءبولىمىنىڭ باسشىسى ارمان حالبەكوۆ، «ماقاتايەۆ شىعارمالارىنىڭ پسيحولوگيالىق اسپەكتىلەرى» تاقىرىبىندا دوكتورلىق جۇمىسىن قورعاعان PhD پسيحولوگيا عىلىمدارىنىڭ دوكتورى، م. ماقاتايەۆتىڭ ولەڭدەرىن اعىلشىن تىلىنە اۋدارعان، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ قاۋىمداستىرىلعان پروفەسسورى تىلەۋبايەۆا مەرۋەرت شاقىرىلدى. شارا الماتى قالاسى مادەنيەت باسقارماسىمەن بىرلەسىپ ۇيىمداستىرىلدى.