الماتىدا «جالپىعا بىردەي ءبىلىم بەرۋ» قورىنان 15 مىڭنان استام وقۋشى تولەم الادى
الماتىدا «مەكتەپكە جول» اكسياسى اياسىندا بەي-جاي قارامايتىن قالا تۇرعىندارى مەن كاسىپكەرلەر بالالارعا قالاي كومەكتەسە الاتىندىعى ايتىلدى، دەپ حابارلايدى aqshamnews.kz
الماتىدا «مەكتەپكە جول» رەسپۋبليكالىق اكسياسى باستالدى. قالانىڭ ءبىلىم باسقارماسىنىڭ اقپاراتى بويىنشا اكسيا 30 قىركۇيەككە دەيىن جالعاسادى، وسى ۋاقىت ىشىندە «جالپىعا بىردەي ءبىلىم بەرۋ» قورىنىڭ، دەمەۋشىلەر مەن مەسەناتتاردىڭ بيۋدجەت قاراجاتى ەسەبىنەن مۇقتاج وقۋشىلارعا كومەك كورسەتىلەدى.
اكسيانىڭ ماقساتى – از قامتىلعان وتباسىلاردان شىققان وقۋشىلارعا، جەتىم بالالارعا، سونداي-اق اتا-اناسىنىڭ قامقورلىعىنسىز قالعان بالالارعا وقۋ جىلىنىڭ باسىنا دايىندىق كەزىندە ماتەريالدىق قولداۋ كورسەتۋ جانە الەۋمەتتىك سەبەپپەن بالالاردىڭ مەكتەپكە كەلمەۋىنىڭ الدىن الۋ.
حالىقتىڭ الەۋمەتتىك وسال توبىنان 15 مىڭنان استام بالا 55 مىڭ تەڭگە كولەمىندە كومەك الادى. قاراجات جەرگىلىكتى بيۋدجەتتەن قارجىلاندىرىلاتىن «جالپىعا بىردەي ءبىلىم بەرۋ» قورىنان بولىنەدى، اقشا مەكتەپ فورماسى مەن كەڭسە جابدىقتارىن ساتىپ الۋعا باعىتتالادى.
كىمدەردىڭ كومەك الۋعا قۇقىعى بار:
• مەملەكەتتىك اتاۋلى الەۋمەتتىك كومەك (ااك) الۋعا قۇقىعى بار وتباسىلاردان شىققان بالالار
• جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن مەملەكەتتىك ااك المايتىن وتباسىلاردان شىققان بالالار،
• جەتىم بالالار جانە اتا-اناسىنىڭ قامقورلىعىنسىز قالعان بالالار،
• توتەنشە جاعدايلار سالدارىنان شۇعىل كومەككە مۇقتاج وتباسىلاردان شىققان بالالار،
• ءبىلىم بەرۋ ۇيىمىنىڭ القالى ورگانى ايقىندايتىن وقۋشىلار مەن تاربيەلەنۋشىلەردىڭ وزگە دە ساناتتارى.
كومەك الۋ ءۇشىن جوعارىدا اتالعان بەس ساناتتىڭ ءبىرىن باسشىلىققا الىپ، بالانىڭ وقۋ ورنى بويىنشا مەكتەپكە ءوتىنىش جازۋ قاجەت.
بالانىڭ اتا-اناسى نەمەسە زاڭدى وكىلى egov.kz ەلەكتروندىق ۇكىمەت پورتالى ارقىلى نەمەسە حالىقتى جۇمىسپەن قامتۋ ورتالىعىنا ءوتىنىش بەرەدى. وزگە جاعدايدا – ءبىلىم بەرۋ ۇيىمىنا راستايتىن قۇجاتتاردى ۇسىنۋ قاجەت.
جوعارىدا اتالعان ساناتتارعا جاتپايتىن وقۋشىلار «مەكتەپكە جول» رەسپۋبليكالىق اكسياسى اياسىندا دەمەۋشىلەر مەن مەسەناتتار ەسەبىنەن كومەك الا الادى. دەمەۋشىلەر، مەسەناتتار جانە بالالارعا كومەك كورسەتكىسى كەلەتىن قالانىڭ بارلىق قامقور تۇرعىندارى اۋداندىق ءبىلىم بولىمدەرىنە جۇگىنە الادى.
اكسيا تۋرالى قوسىمشا اقپاراتتى مىنا جەدەل جەلى تەلەفوندارى ارقىلى بىلۋگە بولادى:
• الاتاۋ اۋدانى: 8 708 970 50 42،
• المالى اۋدانى: 8 707 544 20 89،
• اۋەزوۆ اۋدانى: 8 702 327 36 69،
• بوستاندىق اۋدانى: 8 777 280 66 50،
• جەتىسۋ اۋدانى: 8 708 935 94 98،
• مەدەۋ اۋدانى: 8 775 919 40 00،
• ناۋرىزباي اۋدانى: 8 775 401 45 46،
• تۇركسىب اۋدانى: 8 701 615 49 78.