الماتى قالاسىنىڭ ءبىلىم باسقارماسىنا قاراستى كمقك «№84 بوبەكجاي-بالاباقشاسىندا» «مەكتەپكە دەيىنگى تاربيە مەن وقىتۋ ۇيىمدارىنداعى جوبالىق قىزمەت» تاقىرىبىندا رەسپۋبليكالىق عىلىمي-ادىستەمەلىك كونفەرەنسيا ۇيىمداستىرىلدى، دەپ حابارلايدى aqshamnews.kz
كونفەرەنسيانىڭ ماقساتى – مەكتەپكە دەيىنگى ءبىلىم بەرۋ سالاسىندا ەكولوگيالىق تاربيە بويىنشا جوبالىق قىزمەتتىڭ وزىق تاجىريبەلەرىن كورسەتۋ، تاجىريبە الماسۋ جانە پەداگوگيكالىق قاۋىمداستىقتا ەكولوگيالىق تاربيە ماسەلەلەرىن تالقىلاۋ. كونفەرەنسيادا يننوۆاسيالىق ادىستەر مەن تەحنولوگيالار ۇسىنىلىپ، قاتىسۋشىلارعا تەوريالىق جانە پراكتيكالىق تۇرعىدا ءبىلىم مەن داعدىلار بەرىلەدى.
كونفەرەنسيانىڭ ماڭىزدى ساتتەرى:
- جاڭا جوبانىڭ پرەزەنتاسياسى: سينگاپۋر تاجىريبەسى نەگىزىندە قالدىق زاتتارعا ەكىنشى ءومىر سىيلاۋ جانە ەكولوگيالىق تاربيەنى دامىتۋ؛
- تاربيەلەنۋشىلەر مەن ۇيىمداستىرىلعان ىس-ارەكەتتەردى كورسەتۋ؛
- شەبەرلىك سىنىپتارى؛
- بالاباقشا ىشىندە بالالاردىڭ ەركىن وينايتىن ورتالىقتارىن ۇيىمداستىرۋ بويىنشا ەكسكۋرسيالار؛
- جوبالىق قىزمەتتى ۇيىمداستىرۋ بويىنشا پىكىر الماسۋ؛
- پەداگوگتاردىڭ تاجىريبە الماسۋى.
كونفەرەنسيانىڭ قوناقتارى مەن قاتىسۋشىلارى:
- بالالاردى ەرتە دامىتۋ ينستيتۋتىنىڭ وكىلدەرى؛
- قىزىلوردا وبلىسىنىڭ ءبىلىم باسقارماسىنىڭ قارماقشى اۋدانى بويىنشا ءبىلىم ءبولىمىنىڭ ءبىلىم بەرۋدى دامىتۋ سەكتورىنىڭ باس مامانى – الماگانبەتوۆا حاتيرا ارۋبايەۆنا؛
- استانا، ۇلىتاۋ وبلىسى، تۇركىستان وبلىسىنداعى مەكتەپكە دەيىنگى ۇيىمدارىنىڭ باسشىلارى مەن تاربيەشىلەرى، ادىسكەرلەرى جانە سالا ماماندارى.
كونفەرەنسيانىڭ ماڭىزدى ءبولىمى رەتىندە الماتى قالاسىنىڭ «بالاۋسا» بالاباقشاسىنىڭ مەڭگەرۋشىسى جايسانبايەۆا اكەركە ساعىنىش قىزى 2023 جىلى سينگاپۋر ەلىندە تاعىلىمدامادان ءوتىپ، سول جەردە الىنعان تاجىريبەنى قازاقستانداعى بالاباقشا جۇمىسىن جاقسارتۋ ماقساتىندا قولدانعانىن اتاپ ءوتتى. سينگاپۋردا كومەكشى قۇرالدار مەن اسەم بەزەندىرۋلەر قالدىق ماتەريالداردان جاسالادى، بۇل تاجىريبەنى ول «تابيعات جانە ءبىز» جوباسىندا قولداندى. جوبا ەكولوگيالىق تاربيەگە باعىتتالعان جانە قالدىق زاتتارعا ەكىنشى ءومىر سىيلاۋ كونسەپسياسىمەن جۇزەگە اسىرىلدى.
بۇل شارا مەكتەپكە دەيىنگى ءبىلىم بەرۋ ۇيىمدارى اراسىندا جاڭا يدەيالار مەن تاسىلدەردى قولدانىسقا ەنگىزۋگە مۇمكىندىك تۋعىزدى. قاتىسۋشىلار قالدىق زاتتاردى كومەكشى قۇرال رەتىندە پايدالانۋدىڭ زاماناۋي تاسىلدەرىمەن تانىسىپ، ەكولوگيالىق جوبالىق قىزمەتتى دامىتۋ ءۇشىن جاڭا مۇمكىندىكتەر تۋرالى پىكىر الماستى.
كونفەرەنسيا مەكتەپكە دەيىنگى ءبىلىم بەرۋ سالاسىنداعى يننوۆاسيالاردى ناسيحاتتاپ، پەداگوگتارعا جاڭا ءبىلىم مەن داعدىلار الۋعا كومەكتەستى. بۇل شارا بالاباقشا پەداگوگتارى ءۇشىن پايدالى ءارى مازمۇندى بولدى، سونداي-اق ەكولوگيالىق تاربيە مەن جوبالىق قىزمەتتىڭ وزەكتى ماسەلەلەرىنە نازار اۋداردى.