الماتى قالاسىنىڭ سەگىز اۋدانىنداعى رەفەرەندۋم ۋچاسكەلەرىندە ساياسي ناۋقان ءالى دە جالعاسىپ جاتىر. ولاردىڭ اراسىندا مەكتەپ بىتىرگەن تۇلەك تە داۋىس بەردى، دەپ حابارلايدى Almaty-akshamy.kz Almaty.tv-گە سىلتەمە جاساپ.
باسىم كوپشىلىگىندە تۇرعىندار كەلىپ، بيۋللەتەنگە بەلگى قويىپ ۇلگەرگەن. ودان بولەك، بوستاندىق پەن المالى اۋدانىنىڭ تۇرعىندارى دا ساياسي ناۋقاننان قالىس قالمادى.
ديلناز ءبولباي – بيىل عانا مەكتەبىن اياقتاپ، كامەلەت جاسقا تولدى. بۇگىنگى جاۋاپكەرشىلىكتى ول ءبىر كىسىدەي سەزىنەدى. سەبەبى، تاڭعى ساعات 8:00-دەن قالماي، قالاداعى №270 رەفەرەندۋم ۋچاسكەسىنە كەلىپ، ءوز تاڭداۋىن جاساپتى.
«مەن بۇگىن ءوز تاڭداۋىمدى جاسادىم. بۇل ءبارىمىز ءۇشىن ماڭىزدى دەپ ويلايمىن»، – دەدى قالا تۇرعىنى ديلناز ءبولباي.
ال، رىمعايشا باقايەۆا – اۋەزوۆ اۋدانىنىڭ تۇرعىنى. بيىل سەكسەننىڭ سەڭگىرىنە شىققان ەگدە كىسى دە بۇگىنگى ساياسي ناۋقاننان قالىس قالمادى. اۋداندا 100 رەفەرەندۋم ۋچاسكەسى ورنالاسقان. جالپى اۋدان بويىنشا 200 مىڭعا جۋىق تۇرعىن داۋىس بەرۋگە قۇقىلى.
«بۇگىن مەن دە كەلىپ داۋىس بەردىم. مەن بۇل ساياسي ناۋقانعا قاتىسۋ بورىشىم دەپ بىلەمىن»، – دەدى قالا تۇرعىنى رىمعايشا باقايەۆا.
داۋىس بەرۋ ۋچاسكەلەرىندە مۇمكىندىگى شەكتەۋلى جاندار ءۇشىن دە بارلىق جاعداي جاسالعان. ەستۋ قابىلەتى ناشار جاندار ءۇشىن، ماتەريالدىق تەحنيكالىق بازا تولىعىمەن قامتاماسسىز ەتىلگەن. قۇلاققاپ بار، نوۋتبۋك ورنىندا، داۋىس بەرۋ پروسەسىمەن تانىسۋعا مۇمكىندىك بار. ال، №254 ۋچاسكە ۇلتتىق كىتاپحانادا ورنالاسقان. مۇنداعى ءتىزىم بويىنشا 1739 ادام تاڭداۋ جاساۋعا قۇقىلى. كىتاپحانا قىزمەتكەرلەرى كەلگەن تۇرعىنداردى قازاقتىڭ كۇبىرلەگەن كۇيىمەن قارسى الىپ جاتتى.
«بۇگىنگى كۇن وتە ماڭىزدى، اتا زاڭىمىزعا وزگەرىستەر ەنگىزىلىپ جاتىرمىز. بۇل العاشقى قادام»، – دەدى قالا تۇرعىنى قايىرتاي شەگىروۆ.
ايتا كەتەيىك، الماتىدا بارلىعى 574 رەفەندۋم ۋچاسكەسى جۇمىس ىستەيدى. الماتى ەلىمىزدەگى داۋىس بەرۋشىلەرى جاعىنان ەڭ كوپ قالا. قالالىق رەفەرەندۋم كوميسسياسىنىڭ ءتوراعاسى جاننا اسانوۆانىڭ حابارلاۋىنشا 1 ملن 126 مىڭنان استام ادام بۇگىن ءوز تاڭداۋىن جاساۋعا قۇقىلى.