عالىمدار وزدەرى اشقان جاڭالىقتارى تۋرالى ايتىپ، زەرتتەۋ تاجىريبەسىمەن بولىسەدى
2022 جىلدىڭ 12-13 ءساۋىر ارالىعىندا الماتى قالاسىندا ءا.ح. مارعۇلان اتىنداعى ارحەولوگيا ينستيتۋتىندا قازاق عىلىمىنىڭ اپتالىعىنا ارنالعان ءداستۇرلى «مارعۇلان وقۋلارى – 2022» حالىقارالىق عىلىمي-تاجىريبەلىك كونفەرەنسياسى وتەدى، دەپ حابارلايدى Almaty-akshamy.kz.
كونفەرەنسيادا 2021 جىلى قازاقستان اۋماعىندا جانە كورشىلەس مەملەكەتتەردە جۇرگىزىلگەن ارحەولوگيالىق جۇمىستاردىڭ ناتيجەلەرى تالقىلانادى. كورنەكتى عالىمدار وزدەرىنىڭ اشقان جاڭالىقتارى تۋرالى ايتىپ، زەرتتەۋ تاجىريبەسىمەن بولىسەدى، سونداي-اق وزەكتى عىلىمي ماسەلەلەردى تالقىلايتىن بولادى.
كونفەرەنسيا جۇمىسى كەلەسى باعىتتار بويىنشا جۇزەگە اسىرىلادى: دالالىق ارحەولوگيالىق زەرتتەۋلەردىڭ ناتيجەلەرى 2021 ج.؛ تاس ءداۋىرىنىڭ زەرتتەۋلەرى؛ ەرتە مەتالل ءداۋىرىن زەرتتەۋدىڭ جاڭا دەرەكتەرى مەن ناتيجەلەرى؛ ەۋرازيالىق مادەني كەڭىستىگى كونتەكستىندەگى ەرتە كوشپەلىلەر؛ ورتا عاسىر كەزەڭىندەگى قالا مەن دالا؛ ارحەولوگيالىق زەرتتەۋلەردەگى ءپانارالىق تاسىلدەر؛ ارحەولوگيالىق مۇرانى ساقتاۋدىڭ، كونسەرۆاسيالاۋدىڭ جانە قالپىنا كەلتىرۋدىڭ وزەكتى ماسەلەلەرى، دالالىق زەرتتەۋلەردىڭ جاڭا تەحنولوگيالار مەن زاماناۋي قۇجاتتاۋ تاسىلدەرى.
بارلىعى قازاقستان، رەسەي، ءازىربايجان، وزبەكستان، قىرعىزستان، بەلگيا، يتاليا، اقش جانە ۇلىبريتانيا عالىمدارىنىڭ 100-دەن استام بايانداماسىن جەكە جانە قاشىقتان تىڭداۋ جوسپارلانۋدا.
كونفەرەنسيا اياسىندا «قازاقستاننىڭ وتكەنىن زەرتتەۋدەگى ارحەولوگيالىق جانە پالەوگەنەتيكالىق مالىمەتتەردى ينتەگراسيالاۋ ماسەلەلەرى» تاقىرىبىندا دوڭگەلەك ۇستەل وتەدى. ارحەولوگ-ماماندار مەن گەنەتيكتەر بىرلەسكەن زەرتتەۋلەردىڭ وزەكتى ماسەلەلەرىن، ىنتىماقتاستىق باعىتتارىن، گەنەتيكالىق زەرتتەۋلەردىڭ قازىرگى جاعدايى جانە رەسپۋبليكاداعى دامۋ پەرسپەكتيۆالارىن تالقىلايدى.
جالپى، كونفەرەنسيا عىلىمي بايلانىستار ورناتۋ، اقپارات الماسۋ جانە حالىقارالىق ىنتىماقتاستىقتى نىعايتۋ الاڭىنا اينالادى.