الماتىدا مانياكتىڭ پايدا بولۋى تۋرالى تاراعان اقپاراتقا پوليسيا تۇسىنىكتەمە بەردى، دەپ حابارلايدى aqshamnews.kz
كەشە مەسسەندجەرلەردە الماتى قالاسىنىڭ جۇلدىز-1 ىقشاماۋدانىندا بەلگىسىز ەر ادامنىڭ بالالاردى قۋىپ، ۇرلاماقشى بولىپ جۇرگەنى تۋرالى اقپارات تارادى. حابارلامادا "مانياكتىڭ" ءبىر ايەلدى ۇرىپ-سوققانى ايتىلدى.
الماتى قالاسىنىڭ پوليسيا دەپارتامەنتى بۇل جاعدايعا قاتىستى تۇسىنىكتەمە بەردى.
"ايەلگە دەنە جاراقاتىن سالۋ فاكتىسى بويىنشا قىلمىستىق ءىس قوزعالدى. كۇدىكتىنى ۇستاۋ شارالارى قابىلدانۋدا. سونىمەن قاتار، بالالارعا "اڭشى" مانياك تۋرالى اقپارات شىندىققا سايكەس كەلمەيتىنىن حابارلايمىز"، - دەپ مالىمدەدى پوليسيا دەپارتامەنتى وكىلدەرى.