الماتىلىق دارىگەرلەر 90 جاستاعى ناۋقاستىڭ جامباس بۋىنىن الماستىردى
الماتى قالالىق №4 اۋرۋحانانىڭ ەندوپروتەزدەۋ ءبولىمى مەڭگەرۋشىسى ماناربەك اۋباكىروۆتىڭ ايتۋىنشا، زەينەتكەر اۆتوبۋستان قۇلاپ جاراقات العان. دارىگەرلەر بىردەن جامباس سۇيەگىنىڭ جابىق سۋبكاپيتالدى سىنىعى دەگەن دياگنوز قويىپتى، دەپ حابارلايدى Almaty-akshamy.kz
«اۋرۋحاناعا تۇسكەن كەزدە، پاسيەنت جامباسىنىڭ ءىسىپ كەتكەنىن، قاتتى اۋىراتىنىن ايتىپ شاعىمداندى. سونىمەن قاتار قيمىل-قوزعالىسى قيىنداپ، ءجۇرىپ-تۇرۋدان قالعان. قابىلداۋ بولىمىندە ونى كەشەندى تەكسەرۋدەن وتكىزدىك، تەراپيەۆت، تراۆماتولوگ، انەستيزيولوگتان قۇرالعان مۋلتيديسيپلينارلىق كوماندا قارادى»، - دەدى ماناربەك اۋباكىروۆ.
جاسى توقساندى القىمداعان ۆەرا كيم وتانىڭ بۇل ءتۇرى جايلى جاقسى بىلەدى. سوندىقتان ول وپەراسيا جاساۋعا بىردەن كەلىسىم بەرگەن.
«بازاردان قايتىپ كەلە جاتىپ اۆتوبۋسقا ءمىندىم.تۇسەردە اياعىم تايىپ كەتىپ جولدىڭ جيەگىندەگى تاسقا قۇلادىم. سويتسەم، جامباس سۇيەگىم سىنعان ەكەن. بىردەن "جەدەل جاردەم" شاقىرتىپ، ولار مەنى 4-اۋرۋحاناعا جەتكىزدى. دارىگەرلەر قاراپ شىققاننان كەيىن وتا جاساۋ قاجەتتىگىن ايتتى. بالالارىم دا بىردەن كەلىستى. وپەراسيا تەز، جاقسى جاسالدى. سودان بەرى مىنە، ءبىر اپتا ءوتتى، ءقازىر اياعىمدى باسىپ جۇرەمىن. قارتايعان شاعىمدا وسىنداي قۋانىش سىيلاعان دارىگەرلەرگە ريزامىن»، - دەيدى زەينەتكەر.
بۋىن الماستىرۋ جالپى قۇنى 1،5 ملن تەڭگەدەن باستالاتىن جوعارى تەحنولوگيالىق وپەراسيالار قاتارىنا جاتادى. وتا زەينەتكەرگە ءمامس پاكەتى شەڭبەرىندە تەگىن جاسالدى.
ەندوپروتەزدەۋ - سوڭعى جىلدارى كوپ جاسالىپ جۇرگەن مانيپۋلياسيالاردىڭ ءبىرى. سەبەبى ول بۋىنى اۋىراتىن سىرقاتتىڭ اۋرۋىن جەڭىلدەتىپ، ەمىن-ەركىن ءجۇرىپ-تۇرۋىنا مۇمكىندىك بەرەدى.
مەديسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆتىڭ ايتۋىنشا، ساقتاندىرىلعان تۇرعىندار جوعارى تەحنولوگيالاردىڭ كومەگىمەن جاسالاتىن قىزمەتتەردى، كت، مرت سىندى كونسۋلتاتيۆتىك-دياگنوستيكالىق قىزمەت تۇرلەرىن، رەابيليتاسيالىق كومەكتى تۇراقتى تۇردە پايدالانىپ كەلەدى.
«ءمامس پاكەتىنىڭ اۋقىمى كەڭ. ساقتاندىرىلعان ازاماتتار كوپشىلىكتىڭ قالتاسى كوتەرە بەرمەيتىن وسىنداي وتا تۇرلەرىن جاساتۋ قاجەت بولعان جاعدايدا مەديسينالىق قىزمەتتى كوپ شىعىندالماي، كەدەرگىسىز پايدالانا الادى. سوندىقتان بارشا ازاماتتاردى ساقتاندىرۋ جۇيەسىنە قاتىسۋعا شاقىرامىن»، - دەدى فيليال ديرەكتورى.