2024 جىلى وڭتۇستىك استانادا مىندەتتى الەۋمەتتىك مەديسينالىق ساقتاندىرۋ ەسەبىنەن كورسەتىلگەن قىزمەتتەرگە 97 ملرد تەڭگەگە جۋىق قارجى جۇمسالدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە مەديسينالىق ساقتاندىرۋ قورىنىڭ الماتى قالالىق فيليالى ديرەكتورى ءىلياس مۇحامەدجان مالىمدەدى، دەپ حابارلايدى aqshamnews.kz
ايتۋىنشا، جىل سايىن مەديسينالىق ساقتاندىرۋ ەسەبىنەن كارديوحيرۋرگيا، نەيروحيرۋرگيا، ۋرولوگيا، تراۆماتولوگيا، ونكولوگيا، حيرۋرگيا جانە تاعى دا باسقا پروفيلدەر بويىنشا مىڭداعان وپەراسيا جاسالىپ جاتىر. مۇنداي وپەراسيالار كۇردەلىلىگىنە بايلانىستى ەمحانالار مەن عىلىمي ورتالىقتار دەڭگەيىندە دە جاسالۋى مۇمكىن.
«مىسالى، 2024 جىلى ءمامس ارقىلى 128 مىڭنان استام وپەراسيا جاسالىپ، وعان 79،1 ملرد تەڭگە تولەنگەن. ونىڭ ىشىندە جوعارى تەحنولوگيالاردىڭ كومەگىمەن جاسالاتىن وپەراسيالار مەن مانيپۋلياسيالارعا قور 14،7 ملرد تەڭگە تولەدى. ساقتاندىرىلماعان ازاماتتار وسىنداي وپەراسيالاردى جاساتاتىن بولسا قالتاسىنان بىرنەشە ميلليون تولەگەن بولار ەدى»، - دەپ اتاپ ءوتتى ءىلياس مۇحامەدجان.
2024 جىلدىڭ 9 ايىندا الماتى قالاسىندا 5200 كارديوحيرۋرگيالىق وپەراسيا، 3300 نەيروحيرۋرگيالىق وتا، ءلور-پروفيلى بويىنشا 250 وپەراسيا جاسالعان.
«سوڭعى كەزدە ارتروز، ارتريت سىندى بۋىن اۋرۋلارىنىڭ كوبەيۋىنە بايلانىستى تىزە، جامباس بۋىندارىن الماستىرۋشىلار سانى كۇرت ارتقانى بەلگىلى. 2024 جىلى الماتىلىق تراۆماتولوگتار وسىنداي 3500 وپەراسيا جاساعان. وعان مسق 5،2 ملرد تەڭگە تولەدى»، - دەدى فيليال ديرەكتورى.
سونىمەن قاتار، اعزا الماستىرۋ وپەراسيالارى دا ءمامس ارقىلى قارجىلاندىرىلادى. 2023 جىلى قۇنى 551،8 ملن تەڭگەدەن اساتىن 83 ترانسپلانتاسيا جاسالدى. مۇنداي ءبىر عانا وتانىڭ ءوزى ورتا ەسەپپەن العاندا 7-9 ملن تەڭگە تۇرادى. وسى قىزمەتتەردىڭ ءبارىن ساقتاندىرىلعان ازاماتتار ءمامس ارقىلى قيىندىقسىز پايدالانىپ كەلەدى.