الماتى قالاسىندا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتى جانىنداعى مەملەكەتتىك قىزمەتتەردى كورسەتۋ ماسەلەلەرى بويىنشا ۆەدومستۆوارالىق جۇمىس توبى (ۆاجت) كوشپەلى وتىرىس وتكىزدى.
وتىرىستىڭ نەگىزگى ماقساتى – اۆتوكولىك 
جۇرگىزۋشىلەرىنە ارنالعان مامانداندىرىلعان حالىققا قىزمەت كورسەتۋ ورتالىقتارىنىڭ (حقكو) قىزمەتىن تالداۋ جانە ونى جەتىلدىرۋ جولدارىن قاراستىرۋ بولدى.
جيىنعا ق ر مەملەكەتتىك قىزمەت ىستەرى اگەنتتىگىنىڭ الماتى قالاسى بويىنشا دەپارتامەنتىنىڭ باسشىسى شىناراي ءالىمحان، الماتى قالاسى ءماسليحاتىنىڭ دەپۋتاتى، الماتى قالاسى قوعامدىق كەڭەسىنىڭ ءتوراعاسى التىناي كوبەيەۆا جانە ۆاجت مۇشەلەرى قاتىستى. جۇمىس توبى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ الماتى قالاسى بويىنشا فيليالى ۇسىنعان اقپاراتپەن تانىسىپ، مامانداندىرىلعان حقكو-لاردىڭ جۇمىسى بارىسىندا تۋىندايتىن ماسەلەلەردى جان-جاقتى تالقىلادى.
جيىن بارىسىندا قازىرگى تاڭدا ەلىمىزدە موپەدتەردى تىركەۋ جانە ولاردى باسقارۋ ەرەجەلەرىنە قاتىستى ەنگىزىلىپ جاتقان وزگەرىستەر دە نازارعا الىندى. 2025 جىلدىڭ 5 ساۋىرىنەن باستاپ تىركەلمەگەن موپەدتەردى باسقارۋعا تىيىم سالىنادى. وسىعان بايلانىستى اتالعان مەرزىمگە دەيىن موپەد يەلەرى ءوز كولىكتەرىن زاڭداستىرىپ، قاجەتتى جۇرگىزۋشى كۋالىگىن الۋى ءتيىس. جۇمىس توبى وسى ماسەلە بويىنشا اتقارىلىپ جاتقان شارالارمەن تانىسىپ، ونى حالىققا كەڭىنەن ءتۇسىندىرۋ قاجەتتىگىن اتاپ ءوتتى.
كوشپەلى وتىرىستىڭ قورىتىندىسى بويىنشا ۆاجت «ازاماتتارعا ارنالعان ۇكىمەت» مەملەكەتتىك كورپوراسياسىنىڭ الماتى قالاسى بويىنشا فيليالىنا حقكو قىزمەتتەرى تۋرالى ءاقپاراتتىق-تۇسىندىرۋ جۇمىستارىن كۇشەيتءىپ، مۇگەدەكتىگى بار ازاماتتارعا قولايلى جاعداي جاساۋ، تەوريالىق ەمتيحان تاپسىراتىن كومپيۋتەرلەردىڭ سانىن كوبەيتۋ، مامانداندىرىلعان حقكو-لاردا مەديسينالىق تەكسەرۋ مەكەمەلەرىنىڭ سانىن كوبەيتۋ مۇمكىندىگىن قاراستىرۋ سەكىلدى ءبىرقاتار ناقتى ۇسىنىستار بەردى.
ايتا كەتەيىك، جۇمىس توبى مامانداندىرىلعان حقكو قىزمەتىن جاقسارتۋ حالىققا ساپالى ءارى جەدەل قىزمەت كورسەتۋدىڭ نەگىزگى تەتىگى ەكەنىن اتاپ ءوتتى. الداعى ۋاقىتتا بۇل ۇسىنىستاردىڭ جۇزەگە اسىرىلۋى قالا تۇرعىندارىنىڭ قىزمەت الۋ پروسەسىن ايتارلىقتاي جەڭىلدەتۋگە مۇمكىندىك بەرەدى.