الماتىدا مادەنيەت جانە ونەر قىزمەتكەرلەرى كۇنىنە وراي سالتاناتتى ءىس-شارا ءوتتى. سۋرەتشىلەر، ديزاينەرلەر، مۋزەي ماماندارى، كىتاپحاناشىلار، حورەوگرافتار، اكروباتتار، سوليستەر جانە شىعارماشىلىق توپتاردىڭ مۇشەلەرى مەن ءار ءتۇرلى جانرداعى ارتيستەر مادەنيەت جانە ونەر سالاسىنىڭ دامۋىنا قوسقان ۇلەستەرى ءۇشىن ماراپاتتارعا يە بولدى، دەپ حابارلايدى almaty-akshamy.kz
40-قا جۋىق مامان «مادەنيەت سالاسىنىڭ ۇزدىگى» توسبەلگىسىمەن، سونداي-اق قۇرمەت گراموتالارىمەن، العىس حاتتارمەن ماراپاتتالدى.
«سىزدەردىڭ ەل ءۇشىن جاساپ جۇرگەن ەڭبەكتەرىڭىز ەرەكشە قۇرمەتكە يە. مەملەكەتىمىزدىڭ، ونىڭ ىشىندە الماتى قالاسىنىڭ مادەنيەتى مەن ونەرىن دامىتۋعا، حالقىمىزدىڭ باي مادەني مۇراسىن ناسيحاتتاۋعا ولشەۋسىز ۇلەس قوسىپ، وزدەرىڭىزگە جۇكتەلگەن مىندەتتەردى ۇلكەن ابىرويمەن اتقارىپ كەلەسىزدەر.كاسىبي مەرەكەلەرىڭىز قۇتتى بولسىن! سىزدەرگە زور العىس ايتا وتىرىپ، الداعى ۋاقىتتا دا ۇلتتىق مادەنيەتىمىزدى الەمگە تانىتۋعا باعىتتالعان جاڭا جارقسن جوبالاردى جۇزەگە اسىراسىزدار دەپ كامىل سەنەمىن»، – دەدى ماراپاتتاۋ راسىمىندە قالا اكىمىنىڭ ورىنباسارى بەيبىت شاحانوۆ.
ماراپاتتالعان مامانداردىڭ ءتىزىمى الماتى قالاسى اكىمدىگىنىڭ سايتىندا جاريالانعان.