LED-ەكرانداعى جارناماعا سالىناتىن سالىق مولشەرلەمەسىن ارتتىرۋ الماتى بيۋدجەتىنە تۇسەتىن ءتۇسىمدى جىلىنا 672 ملن تەڭگەگە كوبەيتەدى، دەپ حابارلايدى aqshamnews.kz
الماتىدا قالالىق ءماسليحاتتىڭ كەزەكتى XXII سەسسياسى ءوتىپ، دەپۋتاتتار مەگاپوليس اۋماعىندا سىرتقى جارنامانى ورنالاستىرعانى ءۇشىن اي سايىنعى تولەمنىڭ جاڭا مولشەرلەمەسىن بەكىتتى.
وزگەرىس LED-ەكران تۇرىندەگى نىسانعا جارنامانى ورنالاستىرۋ ءۇشىن اي سايىنعى تولەمگە اسەر ەتتى. بۇرىن سالىق كودەكسىنىڭ مولشەرلەمەسىنە سايكەس جارنامانى ورنالاستىرعانى ءۇشىن اي سايىنعى تولەم – 20 اەك (73 840 تەڭگە) بولسا، ەندى ءماسليحات شەشىمىنە سايكەس «ا» ساناتىنا جاتاتىن كوشەلەردە ورنالاسقان نىساندار بويىنشا اي سايىنعى تولەم – 40 اەك (147 680 تەڭگە) بولادى.
قالالىق جوسپارلاۋ جانە ۋربانيستيكا باسقارماسىنىڭ باسشىسى نۇرلان بورانبايەۆ ايتقانداي، اي سايىنعى تولەمنىڭ بازالىق مولشەرلەمەسىنىڭ ءوسۋى الماتىنىڭ ەلىمىزدەگى ەڭ ءىرى مەگاپوليس بولۋىنا جانە اشىق كەڭىستىكتە ورنالاستىرىلعان جارنامانىڭ الەۋەتتى تۇتىنۋشىلارىنىڭ كوپتىگىنە بايلانىستى.
سونىمەن قاتار، ول بۇل نىساندار ەلەكتر قۋاتىنا، جەر ۋچاسكەلەرىنە قوسىمشا جۇكتەمە تۇسىرەتىنىن، سونداي-اق رەتسىز كورىنىس تۋدىراتىنىن اتادى، تيىسىنشە بۇل شىعىندار تولەم مولشەرلەمەسىنىڭ ءوسۋى ارقىلى وتەلۋگە ءتيىس.
«قالا اۋماعىندا 825 LED-ەكران بار، ونىڭ 728ء-ى «ا» ساناتىنا جاتاتىن كوشەلەردە ورنالاسقان. بۇل رەتتە، ءبىر LED-ەكراندا اي سايىن 10-نان 15-كە دەيىن جارناما بەرۋشى ءونىمىن ورنالاستىرىلادى. مولشەرلەمەنىڭ وزگەرۋى جەرگىلىكتى بيۋدجەتتى ايىنا 55،9 ملن تەڭگەگە ۇلعايتۋعا مۇمكىندىك بەرەدى»، - دەدى نۇرلان بورانبايەۆ.
ونىڭ ايتۋىنشا، قالا كاسىپكەرلەرىنە وسى وزگەرىستەردى بيىل اقپان ايىندا حابارلانعان. قاۋلىنىڭ ءتيىستى جوباسى «اشىق نقا» سايتىندا كوپشىلىك تالقىلاۋ ءۇشىن جاريالاندى.
بۇعان قوسا، وتپەلى كەزەڭ بەرىلەدى، جاڭا مولشەرلەمەلەر وسى جىلدىڭ قاراشا ايىندا كۇشىنە ەنەدى.