1-5 قاراشا ارالىعىندا مەگاپوليستە Almaty Creative Week اپتالىعى وتۋدە، وعان 30 حالىقارالىق ۇيىمنان 130 سپيكەر قاتىسىپ جاتىر.
فورۋمعا نيدەرلاندى، فرانسيا، يتاليا، گەرمانيا، ۇلىبريتانيا، قىرعىزستان، وزبەكستان جانە ت.ب. ەلدەردىڭ كرەاتيۆتى سەگمەنتىنىڭ ۇيىمدارى مەن ءبىلىم بەرۋ جانە كرەاتيۆتى حابتار تارتىلعان دەپ حابارلايدى almaty-akshamy.kz
قالا اكىمىنىڭ ورىنباسارى الىشەر ءابدىقادىروۆ Almaty Creative Week اپتالىعىنىڭ سالتاناتتى اشىلۋىندا الماتىدا كرەاتيۆتى يندۋستريانى دامىتۋعا بارلىق قاجەتتى رەسۋرس بارىن اتادى. ايتۋىنشا، بۇگىندە بۇل سالا بويىنشا قالادا 22 مىڭ كاسىپورىن جۇمىس ىستەيدى. 2021 جىلدىڭ قورىتىندىسىنا سايكەس، كرەاتيۆتى يندۋستريا سالاسىنداعى شاعىن جانە ورتا بيزنەس سۋبەكتىلەرى 5،4 ملرد. تەڭگە سالىق تولەگەن.
«بۇگىنگى فورۋم الماتى قالاسى مەن كرەاتيۆتى قوعامداستىقتىڭ بارلىق وكىلى ءۇشىن اشىق سۇحباتتاسۋ، تاجىريبە الماسۋ، كرەاتيۆتى يندۋستريانىڭ ساپالى ءارى ۇدەمەلى دامۋىنا قاجەتتى جاڭا بيزنەس ۇلگىسىن انىقتاۋ مۇمكىندىك بەرەدى. ءبىزدىڭ دامۋ باعىتىمىز ساۋلەت، ديزاين جانە زاماناۋي ونەر، مۋزىكا، كينو جانە انيماسيا، ءسان جانە قولونەر، جاڭا مەديا جانە سيفرلىق مادەنيەت، كيبەرسپورت جانە گەيم-ديەۆەلوپمەنت سالاسىندا ءوربيتىن بولادى»، – دەدى الىشەر ءابدىقادىروۆ.
سونىمەن قاتار، ول كرەاتيۆتى يندۋستريانى ءتيىمدى دامىتۋ ماقساتىندا الماتىدا ءتيىستى ينفراقۇرىلىم قالىپتاستىرۋ، كاسىپكەرلىكتى ىنتالاندىرۋ، بۇل سالاداعى ءبىلىمدى، داعدىنى جانە قۇزىرەتتى كەڭەيتۋ بويىنشا شارالار قابىلداناتىنىن ايتتى.
الداعى ۋاقىتتا الماتىدا 3 كرەاتيۆتى حاب، IT حاب، قالالىق ۆەنچۋرلىق قور جانە حالىقارالىق دەڭگەيدە ەكى بەينە جانە دىبىس جازۋ ستۋدياسىن اشۋ جوسپارلانىپ وتىر. 2030 جىلعا قاراي كرەاتيۆتى يندۋستريا سالاسىن كەشەندى دامىتۋ الماتىنىڭ جالپى وڭىرلىك ونىمىندەگى كرەاتيۆتى يندۋستريا ۇلەسىن 5%-عا دەيىن جەتكىزىپ، كرەاتيۆتى يندۋستريا ەكسپورتىنىڭ قىزمەتىن 500 ملن. اقش دوللارىنا دەيىن ارتتىرىپ، ونى ەكونوميكالىق ماڭىزدى سالاعا اينالدىرۋعا مۇمكىندىك بەرەدى.
قازاقستان رەسپۋبليكاسى مادەنيەت جانە سپورت ۆيسە-مينيسترى ەرجان ەركىنبايەۆتىڭ ايتۋىنشا، ءقازىر كرەاتيۆتى يندۋستريامەن بايلانىستى وزگەرىستەر مەن تولىقتىرۋلار كاسىپكەرلىك كودەكسىنە جانە «مادەنيەت تۋرالى» زاڭعا ەنگىزىلىپ جاتىر.
ايتا كەتەيىك، 1-5 قاراشا ارالىعىندا الماتىدا كرەاتيۆتى يندۋستريا اپتالىعى ءوتىپ جاتىر. ونىڭ اياسىندا كورمەلەر، پەرفومانستار، شەبەرلىك سىنىپتارى جانە كوپتەگەن باسقا دا ءىس-شارا ۇيىمداستىرىلادى. بۇعان قوسا، تيمۋر بەكمامبەتوۆتىڭ «پروفيل» ءفيلمىنىڭ پرەمەرالىق كورسەتىلىمى، سونىمەن بىرگە، الماتى قالاسى مەن الماتى وبلىسى تۇرعىندارىنىڭ اراسىندا Dota 2 تۇرىندە Almaty Creative Week Esports Cup 2022 كيبەرسپورت ءتۋرنيرى وتەدى.