قابىلداۋشى تاراپ وزىنە كەلگەن شەتەلدىكتەر تۋرالى ىشكى ىستەر ورگاندارىنا حابارلاۋعا مىندەتتى
وڭىرلىك كوممۋنيكاسيالار قىزمەتىنىڭ الاڭىندا الماتى قالالىق پوليسيا دەپارتامەنتى كوشى-قون قىزمەتى باسقارماسىنىڭ باستىعى، پوليسيا پولكوۆنيگى اسحات بۋتۋنچينوۆ بايانداما جاسادى. ول قازاقستان رەسپۋبليكاسىنىڭ كوشى-قون زاڭناماسىنىڭ قاتاڭ ساقتالۋىن ەسكە سالدى، دەپ حابارلايدى Almaty-akshamy.kz.
قالالىق پوليسيا دەپارتامەنتىنىڭ وكىلى ق ر زاڭناماسىنا سايكەس قابىلداۋشى تاراپ (جەكە نەمەسە زاڭدى تۇلعالار) وزىنە كەلگەن شەتەلدىكتەر تۋرالى ىشكى ىستەر ورگاندارىنا حابارلاۋعا مىندەتتى ەكەنىن حابارلادى.
حابارلاما شەتەلدىك ازامات كەلگەن ساتتەن باستاپ ءۇش جۇمىس كۇنى ىشىندە بەرىلەدى.
ىشكى ىستەر ورگاندارىن بەلگىلەنگەن مەرزىمدە حاباردار ەتپەگەن جاعدايدا قابىلداۋشى تاراپ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 518-بابى بويىنشا اكىمشىلىك جاۋاپكەرشىلىككە تارتىلادى.
كەلەسى ايىپپۇلدار قاراستىرىلعان:
- جەكە تۇلعالارعا - ەسكەرتۋ، قايتالاپ بۇزعان جاعدايدا - 91 890 تەڭگەنى قۇرايتىن 30 اەك مولشەرىندە اكىمشىلىك ايىپپۇل،
- زاڭدى تۇلعالارعا - 10-نان 25 اەك-كە دەيىن ايىپپۇل، ال قايتالاپ بۇزعان جاعدايدا - 100 اەك-كە دەيىن ايىپپۇل سالىنادى، بۇل 306 مىڭ تەڭگە.
سونداي-اق حابارلاندىرۋ ءۇش جولمەن جىبەرىلەتىنىن حابارلايمىز:
بىرىنشىدەن، قابىلداۋشى تاراپ ۆيزا جانە كوشى-قون پورتالى ارقىلى حابارلاما جىبەرەدى. ول ءۇشىن سىزدە ەلەكتروندى سيفرلىق قولتاڭبا جانە شەتەلدىكتىڭ ءتولقۇجات دەرەكتەرى بولۋى كەرەك،
ەكىنشىدەن: قابىلداۋشى تاراپ حابارلامانى تىكەلەي ءوز ايماعىنداعى كوشى-قون قىزمەتىنىڭ بولىمدەرىنە جىبەرەدى.
ۇشىنشىدەن: قابىلداۋشى تاراپ E-konak قوسىمشاسى ارقىلى حابارلاما جىبەرەدى. ول ءۇشىن وسى قولدانبانى جۇكتەپ الىپ، اۆتوريزاسيادان ءوتىپ، حابارلامانى تولتىرۋ كەرەك.
"قازاقستان رەسپۋبليكاسى ازاماتتارىنىڭ جانە شەتەل ازاماتتارىنىڭ قازاقستان رەسپۋبليكاسىنىڭ كوشى - قون زاڭناماسىن قاتاڭ ساقتاۋىنا تاعى دا نازارلارىڭىزدى اۋدارامىن"، - دەپ قورىتىندىلادى وكق سپيكەرى.