بيىل الماتىدا ۇزىندىعى 250 كم بولاتىن 274 كوشەگە ورتاشا جوندەۋ جۇمىستارى جۇرگىزىلەدى. وسىلايشا، جاقسى جانە قاناعاتتانارلىق جاعدايداعى جولداردىڭ ۇلەسىن 92%-عا دەيىن جەتكىزۋ جوسپارلانعان، دەپ حابارلايدى aqshamnews.kz
20 ماگيسترالدى كوشەدە جول توسەمىنىڭ بەرىكتىگىن ارتتىرۋ ءۇشىن پوليمەراسفالتبەتون قولدانىلىپ جاتىر. جوندەلەتىن اۋماقتار 36 ساعاتقا جابىلادى، بۇل ۋاقىتتا قوسپا سۋىپ، ءتيىستى تالاپقا ساي قاتۋى كەرەك.
قالا اكىمى ەربولات دوسايەۆتىڭ تاپسىرماسىمەن ماگيسترالدى كوشەلەردىڭ جوندەۋ جۇمىستارى تامىز ايىنىڭ سوڭىنا دەيىن، ال اۋداندىق ماڭىزى بار كوشەلەردىڭ جوندەۋى قازان ايىنىڭ سوڭىنا دەيىن اياقتالادى.
اسفالتتى قىرىپ، جاڭاسىن توسەۋ جۇمىستارى تۇنگى ۋاقىتتا جۇرگىزىلۋدە، بۇل قالا تۇرعىندارى ءۇشىن قولايسىزدىقتى ازايتۋ ماقساتىندا جاسالىپ جاتىر.
ورتاشا جوندەۋ اياسىندا جول قاۋىپسىزدىگىن ارتتىرۋ ماقساتىندا قوسىمشا قاۋىپسىزدىك ارالدارى مەن جاياۋ جۇرگىنشىلەر وتكەلدەرى جاسالىپ، تروتۋارلار جوندەلىپ، زاقىمدالعان ارىق ناۋالارى اۋىستىرىلىپ جاتىر.
ايتا كەتەيىك، كولىك قوزعالىسىن شەكتەۋ تۋرالى بارلىق اقپارات Almaty.kz سايتىندا، @AlmatyJoly Telegram-ارناسىندا، اۋدان اكىمدىكتەرى مەن باسقارمالاردىڭ الەۋمەتتىك جەلىلەرىندە، سونداي-اق 2GIS جانە «ياندەكس كارتا» سەرۆيسىندە كورسەتىلگەن.