وتكەن جىلى رىسقۇلوۆ داڭعىلى – ەمسوۆ كوشەسى قيىلىسىندا كولىك ايرىعى ىسكە قوسىلعان.
اكىمشىلىك پوليسيا باسقارماسىنىڭ مالىمدەۋىنشە، الماتىدا جاڭا جول-كولىك ايرىقتارى سالىنادى، دەپ حابارلايدى Almaty-akshamy.kz
بيىل ساين كوشەسى مەن موڭكە بي كوشەسىنىڭ قيىلىسىندا كولىك ايرىعىن سالۋ، سونداي-اق تولە بي داڭعىلىن ۇزارتۋ جۇمىستارىن باستاۋ جوسپارلانۋدا.
«بيىل سونداي-اق اباي داڭعىلى، ساين كوشەسى، اۋەزوۆ كوشەسىن سوزۋ، سەيفۋللين داڭعىلى مەن جانسۇگىروۆ كوشەسىنىڭ قيىلىسىندا، قۇلجا تاس جولى مەن بۇقتىرما كوشەسىنىڭ قيىلىسىندا كولىك ايرىعىن سالۋ، سونداي-اق «سارىارقا» جانە «ب.مومىش ۇلى» بەكەتتەرى بار ۇزىندىعى 3،1 شاقىرىمدى قۇرايتىن مەترو جەلىسىن پايدالانۋعا بەرۋ جوسپاردا بار. بۇدان بولەك، «دۋمان» ىقشاماۋدانىنداعى ۇزىندىعى 30،5 شاقىرىم جولدى كۇردەلى جوندەۋ جۇمىستارىن اياقتاۋ، «العاباس»، «قايرات»، «المەرەك» ىقشاماۋداندارىنداعى 43،1 شاقىرىمدى قۇرايتىن 141 كوشەدە جول قۇرىلىسىن اياقتاۋ جوسپارلانۋدا»، – دەدى اكىمشىلىك پوليسيا باسقارماسى باستىعىنىڭ ورىنباسارى بولاتبەك باياتانوۆ.