الماتىدا كوشەدەگى ادامداردى پىشاقپەن قورقىتىپ، توناۋدى ادەت قىلعان توپ ۇستالدى

قالادا پىشاقپەن قارۋلانعان جاستار توبى ءوتىپ بارا جاتقان ادامداردى توناعان.

مەدەۋ اۋدانىنىڭ پوليسيا قىزمەتكەرلەرى سەريالىق توناۋ دەرەگىن انىقتادى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

"ق ر قىجك-نىڭ 128-بابىنا سايكەس، ق ر قك-نىڭ 192-بابى 2-بولىگىنىڭ 1،4-تارماعىندا كوزدەلگەن توناۋ، ياعني ۇرلىق ماقساتىندا بوتەننىڭ مۇلكىنە كۇش قولدانۋ ارقىلى ادامدار توبىنىڭ ءسوز بايلاسۋى بويىنشا قارۋ قولدانۋمەن جاسالعان ۇرلىق، قىلمىستىق قۇقىقبۇزۋشىلىقتى جاسادى دەگەن كۇدىك بويىنشا 17 جاستاعى د.، ج.، ن. جانە 19 جاستاعى ب. ەسىمدى ازاماتتار ۇستالدى. ولار زاڭسىز بايۋ ماقساتىندا پىشاقپەن قورقىتىپ، ءوتىپ بارا جاتقان ادامداردى ۇرىپ-سوعىپ، ۇيالى تەلەفوندارى مەن باسقا دا مۇلىكتەرىن تارتىپ العان. ءبىر قىزىعى، بۇل “كۆارتەت” ساياباقتار مەن حالىق كوپ جينالاتىن جەرلەردە جۇرگەن. ولار قورعانسىز ازاماتتارعا تۇنگى ۋاقىتتا عانا شابۋىل جاساعان. اتالعان ادامدار ۇستالىپ، قاراقشىلىق شابۋىل جاساعاندارىن مويىندادى"، –  دەدى مەدەۋ اۋداندىق پوليسيا باسقارماسىنىڭ باستىعى داۋرەن وتەبايەۆ.

قازىرگى ۋاقىتتا ۇستالعانداردىڭ جالپى الماتى قالاسى بويىنشا وسىعان ۇقساس، بۇرىن جاسالعان قىلمىستارعا قاتىسى بار-جوعى تەكسەرىلۋدە. ال اتالعان كۇدىكتىلەردىڭ قىلمىستىق ارەكەتتەرىنەن زارداپ شەككەن ازاماتتاردى ءتارتىپ ساقشىلارى مەدەۋ اۋداندىق پب-عا كەلەسى تەلەفون نومىرلەرى ارقىلى حابارلاسۋدى سۇرايدى: 8 (727) 254-48-02؛ 8-702-476-66-60.