ءقاۋىپتى ىندەتتىڭ جۇرەككە قالاي اسەر ەتىپ، ۆاكسينانى كەيىنگە قالدىرۋدىڭ قانداي قاجەتتىلىگى بارى جايىندا كارديولوگيا جانە ىشكى اۋرۋلار عىلىمي-زەرتتەۋ ينستيتۋتى باسقارما ءتوراعاسىنىڭ ورىنباسارى، مەديسينا عىلىمدارىنىڭ كانديداتى قۇرمانعازى مادالييەۆ وڭىرلىك كوممۋنيكاسيالار قىزمەتى الاڭىندا وتكەن باسپا ءسوز كونفەرەنسياسىندا مالىمدەدى. ءىس-شارا دۇنيەجۇزىلىك جۇرەك كۇنى اياسىندا ءوتتى، دەپ حابارلايدى almaty-akshamy.kz
قۇرمانعازى مادالييەۆتىڭ ايتۋىنشا، كوروناۆيرۋس ورگانيزمدە ءبىرقاتار وزگەرىستەر تۋدىرادى. بۇل جۇرەك-قان تامىر جۇيەسىنە دە اسەر ەتەدى. قان ۇيۋىنىڭ بۇزىلۋى ميكروترومبتاردىڭ پايدا بولۋىنا، ال تامىر قابىرعاسىنىڭ قاتتىلىعىنىڭ وزگەرۋى قان قىسىمىنىڭ جوعارىلاۋىنا اكەلەدى. بۇل ۆيرۋستىڭ كەيبىر سالدارى. كوۆيد، اسىرەسە، جۇرەك پەن قان تامىرلارى اۋرۋلارى بار ادامداردىڭ دەنساۋلىعىنا زيان تيگىزۋى مۇمكىن. اۋرۋ قالىپتى جاعدايدى ناشارلاتىپ، داعدارىسقا اكەلۋى مۇمكىن.
«كوروناۆيرۋستى جۇقتىرعان بارلىق ادامدا جۇرەك پەن قان تامىرلارى پروبلەمالارى بولادى دەپ ايتۋ بولمايدى. تاۋەكەل توبىنداعى ادامدار ءبىرىنشى ورىندا. تاجىريبە كورسەتكەندەي، يشەميالىق اۋرۋ، ارتەريالىق گيپەرتەنزيا سياقتى سوزىلمالى اۋرۋلارى بار، ەندوكريندىك جۇيەنىڭ پروبلەمالارى بار ادامداردا قانت ديابەتى، ارتىق سالماق، قارت ادامداردا ترومب ءتۇزىلۋىنىڭ جوعارىلاۋى بايقالادى. جۇرەكتىڭ يشەميالىق اۋرۋى، تامىرلاردىڭ اتەروسكلەروتيكالىق زاقىمدانۋى بار ەمدەلۋشىلەردە كورونارلىق تامىرلاردىڭ ميكروترومبوزىنا بايلانىستى قايتالاناتىن ينفاركت بولۋى مۇمكىن. سوندىقتان سوزىلمالى اۋرۋلارى بار ناۋقاستارعا اسا ساق بولۋ كەرەك»، - دەيدى كارديولوگ.
قۇرمانعازى مادالييەۆ جۇرەكتى نىعايتاتىن ەڭ جاقسى «ۆيتامين» بەلسەندى دەمالىس، دۇرىس تاماقتانۋ، ۇيقى مەن سەرگەكتىك، تۇراقتى دەنە بەلسەندىلىگى: سەرۋەندەۋ، فيزيوتەراپيالىق جاتتىعۋلار، جۇگىرۋ ەكەنىن اتاپ ءوتتى.
عىلىمي-زەرتتەۋ ينستيتۋتى باسقارما ءتوراعاسىنىڭ ورىنباسارى كارديوحيرۋرگتاردىڭ مۇمكىندىكتەرى تۋرالى ايتتى.
«ءبىزدىڭ ينستيتۋتتا ءبىز اورتا ستەنوزى مەن كەنەتتەن قايتىس بولۋ ءقاۋپى جوعارى ناۋقاستارعا وپەراسيا جاسايمىز. مۇمكىندىكتەر مەن جاڭاشىل كوزقاراستىڭ ارقاسىندا ءبىز پاسيەنتتەردىڭ ءومىرىن ساقتاپ، جاقسارتا الامىز. 2020 جىلدىڭ قاڭتارىنان باستاپ ءبىزدىڭ ينستيتۋتتىڭ كۇندىزگى ستاسيونارىندا دياگنوستيكالىق كوروناروگرافيا امبۋلاتوريالىق جاعدايدا جۇرگىزىلەدى. ءبىز جۇرەكتىڭ كۇردەلى اريتمياسىن كاتەتەرمەن ەمدەۋ سالاسىندا يننوۆاسيالىق تەحنولوگيالاردى قولدانامىز»، - دەدى قۇرمانعازى مادالييەۆ.
ول ينستيتۋت قارت ناۋقاستارعا قىزمەت ەتەتىنىن، مىسالى، ەڭ ۇلكەنى 94 جاستا ەكەنىن ايتتى. ونىڭ ۇستىنە بارلىق وتالار اقىسىز جۇزەگە اسىرىلادى.