مونيتورينگ توبى 3 شىلدەگە قاراعان ءتۇنى كوڭىل كوتەرەتىن ورىنداردا كارانتين ءتارتىبىن بۇزعان 14 جاعدايدى انىقتادى.
الماتىنىڭ مونيتورينگ توپتارى 3 شىلدەگە قاراعان ءتۇنى كوڭىل كوتەرەتىن ورىنداردا كارانتين ءتارتىبىن بۇزعان 14 جاعدايدى انىقتادى، دەپ حابارلايدى Almaty-ashamy.kz.
ماسەلەن، مەدەۋ اۋدانىنىڭ مونيتورينگ توپتارى Laureate كاراوكەسىندە 100-گە جۋىق كەلۋشى بولعانىن، وسىلايشا كارانتيندىك شەكتەۋلەردىڭ بۇزىلعانىن انىقتادى. كاراوكە ءىشى تار، الەۋمەتتىك اراقاشىقتىق ساقتالماعان، كەلۋشىلەر كارانتيندىك شەكتەۋلەردى ەلەمەگەن.
قالا تۇرعىندارى مەن قوناقتارى سانيتارلىق دارىگەرلەردىڭ ۇسىنىمدارى مەن ەرەجەلەرىن ەلەمەي، توي وتكىزۋدە. مىسالى، 2 شىلدەدەن 3 شىلدەگە قاراعان ءتۇنى «اتموسفەرا» بارىندا 150 قوناق قاتىسقان سالتاناتتى شارا وتكىزىلگەن. بۇل فاكت بويىنشا اۋداندىق سانيتارلىق-ەپيدەميولوگيالىق باقىلاۋ باسقارماسىنا بەرۋ ءۇشىن اكىمشىلىك ماتەريال جينالدى.
سانيتارلىق-ەپيدەميولوگيالىق باقىلاۋ دەپارتامەنتىندە اتاپ وتكەندەي، الدىن الۋ شارالارىن جاپپاي ەلەمەۋدىڭ سالدارىنان كوروناۆيرۋستىڭ جاڭا شتامدارى ءورشي ءتۇستى، سوندىقتان قازىرگى كەزدە ساقتانۋ شارالارىن قاتاڭ ۇستانعان ءجون. الماتىدا ادامداردىڭ كوپشىلىك جانە جابىق كوڭىل كوتەرەتىن ورىندارعا، تويلارعا جانە باسقا دا مەرەكەلىك شارالارعا بارۋى جالعاسۋدا.
ايتا كەتەرلىگى، كوروناۆيرۋس دەرتى قالادا ەكى ەسەدەن دە اسىپ ءتۇستى. مەگاپوليستە دەرت جۇقتىرعان 56 مىڭ ادام تىركەلدى، ولاردىڭ 4573ء-ى - ماۋسىم ايىندا اۋىرعاندار. 2 شىلدەدە تاعى 385 ادام كوروناۆيرۋس ينفەكسياسىن جۇقتىرعان. 2021 جىلدىڭ ءبىرىنشى جارتىسىندا دەرت وتكەن جىلدىڭ وسى كەزەڭىمەن سالىستىرعاندا 10 ەسەگە ارتقان.
الماتىنىڭ مەملەكەتتىك باس سانيتارلىق دارىگەرى ج. بەكشين تويلاردىڭ، ءتۇرلى بۇقارالىق شارالار مەن باسقوسۋلاردىڭ ينفەكسيانى جۇقتىرۋدىڭ نەگىزگى وشاعىنا اينالعانىن ايتتى. ويتكەنى، ينفەكسيانىڭ 55%-ى قوعامدىق ورىنداردا، مەيرامحانالار، كاراوكە جانە تۇنگى كلۋبتاردا جۇعۋدا.
قازىرگى كەزدە پروفيلاكتيكالىق شارالاردى ساقتاۋ وتە ماڭىزدى، ويتكەنى «دەلتا» شتامىنىڭ اينالىمى جەدەل، بۇل ينفەكسيانى، اسىرەسە، جاستار تەز جۇقتىرۋدا. سوندىقتان ساقتىق شارالارىنا ەرەكشە ءمان بەرۋ كەرەك. جالپى، كوروناۆيرۋس ينفەكسياسىن جۇقتىراتىنداردىڭ باسىم بولىگى 20-39 جاستاعى (37،6%) جانە 40-59 جاستاعى (23،2%) قالا تۇرعىندارى. سانيتارلىق دارىگەرلەردىڭ ايتۋىنشا، كۆي-دى جۇقتىرۋعا قوعامنىڭ بەلسەندى بولىگى وتە بەيىم.
دارىگەرلەر مەن سانيتارلىق دارىگەرلەر قالا تۇرعىندارىن بەلگىلەنگەن ەرەجەلەردى مىندەتتى تۇردە ساقتاۋعا شاقىرادى، ولاردىڭ بۇزىلۋى ءقاۋىپتى ۆيرۋستىڭ تارالۋىنا اكەلەدى. دەرتتىڭ الدىن الۋدىڭ ءبىر عانا جولى بار، ول - ۆاكسينا سالدىرۋ.
بۇرىن حابارلانعانداي، 1 قاڭتاردان 29 ماۋسىم ارالىعىندا مونيتورينگ توپتارى 27800-دەن استام نىساندى تەكسەردى، ونىڭ 2463-ىندە زاڭ بۇزۋشىلىقتار انىقتالدى. 4581 حاتتاما تولتىرىلىپ، ونىڭ ىشىندە زاڭدى تۇلعالارعا 155 ملن تەڭگەگە 442 ايىپپۇل سالىندى. جەكە تۇلعالارعا بەتپەردە رەجيمىن بۇزعانى ءۇشىن 181،5 ملن تەڭگەگە 4139 حاتتاما جازىلدى.
ايىپپۇل تۇرىندەگى اكىمشىلىك جاۋاپكەرشىلىكپەن قاتار، سوتتاردىڭ شەشىمى بويىنشا قىزمەتتى توقتاتا تۇرۋ تۇرىندە قاتاڭ شارالار دا قولدانىلۋدا. اعىمداعى جىلى سوتقا 75 ماتەريال جىبەرىلدى، ونىڭ 64ء-ى بويىنشا شەشىم قابىلداندى.