جاركەنت قۇرىلىسشىلارى مەكتەپ سالا باستادى

ۇستىمىزدەگى جىلى الماتى وبلىسىندا 28 مەكتەپ سالىنادى.

جەتىسۋ قۇرىلىسشىلارى مەكتەپ سالا باستادى. ۇستىمىزدەگى جىلى بۇل وڭىردە 30 شاقتى ءبىلىم ورداسى بوي كوتەرەدى، دەپ حابارلايدى Almaty-akshamy.kz وبلىس اكىمىنىڭ باسپا ءسوز قىزمەتىنە سىلتەمە جاساپ.

الماتى وبلىسى پانفيلوۆ اۋدانىندا قازىرگى ۋاقىتتا 3 مەكتەپتىڭ قۇرىلىسى باستالدى. سونىڭ ىشىندە ەكى مەكتەپ جاڭادان سالىنادى. 

پانفيلوۆ اۋداندىق اكىمدىگىنىڭ مالىمەتىنشە، باسقۇنشى اۋىلىندا 300 ورىندىق مەكتەپ بوي كوتەرۋدە. ونىڭ قۇرىلىسىمەن قوسا ماتەريالدىق بازاسىن تولىق جابدىقتاۋعا 1 ملرد 703 ملن تەڭگە قارجى بولىنگەن.

ال اققۇدىق اۋىلىنىڭ تۇرعىندارى بالالارىنىڭ جاڭا مەكتەپتە وقيتىنىنا ءدان ريزا. بايباتشايەۆ اتىنداعى 120 ورىندىق ورتا مەكتەپتىڭ قۇرىلىسى ءقازىر قارقىندى ءجۇرىپ جاتىر. 703 ملن تەڭگە قارجى بولىنگەن وسى مەكتەپتىڭ بۇرىنعى نىسانى اپاتتى دەپ تانىلعان بولاتىن.

سول سياقتى شەكاراعا جاقىن قورعاس اۋىلىنداعى ورتا مەكتەپكە كۇردەلى جوندەۋگە 352.9 ملن تەڭگە ءبولىندى. اۋدانعا قاراستى كىشى شىعان ورتا مەكتەبى دە كۇردەلى جوندەۋدى تالاپ ەتەدى. مەكتەپ عيماراتىن كۇردەلى جوندەۋدەن وتكىزۋگە جوبالاۋ-سمەتالىق قۇجاتتارىن دايىنداۋعا وبلىستىق بيۋدجەتتەن 15،5 ملن تەڭگە قاراستىرىلعان.

وسى اتالعان قۇرىلىس نىساندارىندا شامامەن 150-دەن استام جەرگىلىكتى تۇرعىن جۇمىسپەن قامتىلۋدا.

جالپى، بيىل الماتى وبلىسىندا 28 مەكتەپتىڭ قۇرىلىسى جۇرگىزىلەدى، سونىڭ 19-ى ءۇش اۋىسىمدى مەكتەپتەردىڭ ورنىنا تۇرعىزىلادى. جانە بۇل قاتاردا «جۇمىسپەن قامتۋ جول كارتاسى» اياسىندا سالىناتىن 7 مەكتەپتىڭ دە بار ەكەنىن دە اتاپ ءوتۋ كەرەك.