الماتىدا كوروناۆيرۋس جۇقتىرعان 637 ناۋقاس ەم قابىلداپ جاتىر. بۇل تۋرالى قالالىق قوعامدىق دەنساۋلىق باسقارماسىنان ءمالىم ەتتى، دەپ حابارلايدى almaty-akshamy.kz
21 قاراشا كۇنگى اقپارات بويىنشا، ءبىر تاۋلىكتە قالادا 127 ادام كوروناۆيرۋس جۇقتىرعان. مۇنىڭ ىشىندە سيمپتومدى، جەڭىل جانە ورتاشا دەڭگەيدەگى بەلگىلەرمەن – 116، سيمپتومسىز – 11 ناۋقاس تىركەلدى. بارلىق ەمدەلىپ شىققاندار – 14، كەلىپ تۇسكەنى – 38. «ينفەكسيالىق ستاسيونارلاردا 637 ادام بار (توسەك-ورىننىڭ جالپى سانى –1774)، ونىڭ ىشىندە 24 بالا ەمدەلۋدە»، – دەپ ناقتىلادى قوعامدىق دەنساۋلىق باسقارماسىنىڭ باسپا ءسوز قىزمەتىنەن.
سونداي-اق، رەانيماسيا جانە قارقىندى تەراپيا بولىمىندە 68 ادام جاتىر. ال 24 ناۋقاس جاساندى تىنىس الۋ اپپاراتىنا قوسىلعان. ءينۆازيۆتى ەمەس جاساندى تىنىس الۋ اپپاراتىندا 36 ادام ەم قابىلداۋدى جالعاستىرۋدا. High flow-دا 9 اپپارات جۇمىس ىستەيدى.
مەديسينالىق-سانيتاريالىق العاشقى كومەك ءموبيلدى بريگادالارىنىڭ جانە تەلەمەديسينا ورتالىعىنىڭ امبۋلاتوريالىق باقىلاۋىندا 1077 پاسيەنت بار.
ونىڭ ىشىندە ىندەت بەلگىلەرى بار، ورتاشا اۋىر جاعدايدا – 1019 ناۋقاس. 58 ادامدا كوروناۆيرۋس بەلگىلەرى جوق.