الماتىدا پسيحيكالىق دەنساۋلىق ورتالىعىنىڭ بازاسىندا ءبىر ايعا جۋىق ۋاقىت ىشىندە ينفەكسيالىق ستاسيونار اشىلدى.
ونىڭ جۇمىسى جانە COVID-19 دياگنوزى راستالعان ادامدارعا، ناۋقاستاردىڭ تۋىستارىنا، سونداي-اق كوروناۆيرۋستىق پاندەمياعا بايلانىستى جۇمىسىنان ايىرىلعان ادامدارعا قانداي پسيحولوگيالىق قولداۋ كورسەتىلەتىنى تۋرالى ورتالىق ديرەكتورى ساپار راحمەنشەيەۆ وڭىرلىك كوممۋنيكاسيالار قىزمەتىنىڭ بريفينگىندە ايتتى، دەپ حابارلايدى Almaty-akshamy.kz
ساپار راحمەنشەيەۆتىڭ ايتۋىنشا، ورتالىق بازاسىنداعى كوۆيدتىك ستاسيونار جۇمىس ىستەپ تۇرعان كەزەڭدە اۋرۋ اعىمىنىڭ ءتۇرلى دارەجەسىمەن 864 ناۋقاس ءتۇستى، 435 ناۋقاس شىقتى، 8 ادام قايتىس بولدى.
ول اۋىر دارەجەلى بارلىق ناۋقاستارعا كوروناۆيرۋس ينفەكسياسىنا قارسى ەكپە سالىنباعانىن اتاپ ءوتتى.
«قازىرگى ۋاقىتتا ءبىز بارىمىزدە بەلگىسىزدىك، كۇيزەلىس جانە COVID-19 ينفەكسياسىنىڭ ءقاۋپى تۋرالى الاڭداۋشىلىق بار. كوروناۆيرۋستىق ينفەكسيانىڭ تارالۋى بۇگىندە ۋشىعىپ تۇر، جاڭا شتامدار، «تولقىندار» پايدا بولۋدا»، - دەيدى ساپار راحمەنشەيەۆ.
الماتى پسيحيكالىق دەنساۋلىق ورتالىعىنىڭ ديرەكتورى قازىرگى جاعدايعا بايلانىستى تۇرعىندار اراسىندا ۇرەيگە جول بەرمەۋ وتە ماڭىزدى ەكەنىن اتاپ ءوتتى. مامان كارانتيندىك شەكتەۋلەر كەيبىر ادامداردىڭ ەموسيونالدى جاعدايىنا كەرى اسەر ەتەتىنىن دە ايتتى.
«ءبىز كوروناۆيرۋستىق ينفەكسياسىنا شالدىققان ناۋقاستاردىڭ ەستۋ قابىلەتىنىڭ ناشارلاعانىن، تەز اشۋلاناتىنىن، ۇرەيلەنەتىنىن، ءتىپتى اگرەسسيانى بايقايمىز. مۇنىڭ ءبارى ولارعا دەرت كەزىندە دۇرىس تىنىس الماۋى سالدارىنا بولعان پسيحيكالىق اۋىتقۋشىلىق. ءبىراق، مۇنىڭ ءبارى ۋاقىتشا قۇبىلىستار. ەمدەلىپ شىققان سوڭ ءبىزدىڭ ماماندار پاسيەنتتەرمەن دارى-دارمەكتەرسىز، سەنىم تەلەفونى ارقىلى جۇمىس جاسايدى»، - دەيدى ساپار راحمەنشەيەۆ.
ول بۇگىندە قالا تۇرعىندارىن تەك ۆيرۋستان عانا ەمەس، سونىمەن بىرگە اقپاراتتىق اعىننان دا سەكەمدەنەتىنىن ايتتى.
«ارينە، ادامدار اقپارات الۋلارى كەرەك، ءبىراق جەرگىلىكتى دەنساۋلىق ساقتاۋ ورگاندارى سياقتى سەنىمدى كوزدەردەن الىنعان اقپاراتقا جۇگىنۋ كەرەك. جالعان اقپاراتقا سەنبەگەن ابزال»، - دەپ قوستى ساپار راحمەنشەيەۆ.
ول الماتىلىقتاردان ءوزىن-وزى ەمدەمەۋدى، ءبىراق سۇراقتار تۋىنداعان جاعدايدا تەلەمەديسينا ورتالىعىنىڭ تەلەفونىنا حابارلاسۋدى ءوتىندى. بۇگىندە 11 632 ناۋقاستى دارىگەرلەر قاشىقتان باقىلاۋدا.