جۇرىمبەك سىدىقوۆ – عالىم، گيدروگەوحيميا عىلىمىنىڭ نەگىزىن قالاۋشى.
الماتىدا كورنەكتى گيدروگەولوگ-عالىم، گيدروگەوحيميالىق عىلىمنىڭ نەگىزىن قالاۋشى، ۇلى وتان سوعىسىنىڭ ارداگەرى، قازاقستان رەسپۋبليكاسىنىڭ ەڭبەك سىڭىرگەن عىلىم قايراتكەرى، گەولوگيا-مينەرالوگيا عىلىمدارىنىڭ دوكتورى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، ق ر ۇعا اكادەميگى جۇرىمبەك سىدىقوۆتىڭ قۇرمەتىنە مەموريالدى تاقتا سالتاناتتى تۇردە اشىلدى، دەپ حابارلايدى Almaty-akshamy.kz
الماتى قالاسى مادەنيەت باسقارماسى باسشىسىنىڭ ورىنباسارى دانيار الييەۆ ءوزىنىڭ سوزىندە جۇرىمبەك سىدىقوۆتىڭ قانىش ساتبايەۆ، ۋفا احمەدسافين، ناتاي كەنەسارين سىندى تانىمال عالىمداردىڭ ءىزباسارى بولعانىن اتاپ ءوتتى.
مەموريالدى تاقتا ق.ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتى جانىنداعى ءۋاليحانوۆ كوشەسى، 94 مەكەنجايدا ورنالاسقان ۋ.م. احمەدسافين اتىنداعى گيدروگەولوگيا جانە گەوەكولوگيا ينستيتۋتىنىڭ قابىرعاسىنا ورناتىلدى. مۇندا جۇرىمبەك سىدىقوۆ 70 جىلعا جۋىق جۇمىس ىستەگەن بولاتىن.
«ول ناعىز زيالى ەدى، تەرەڭ عىلىمي ءبىلىمى، ىزگى نيەتى مەن ادامگەرشىلىك قاسيەتتەرى ءۇشىن ارىپتەستەرى مەن زامانداستارىنىڭ ۇلكەن قۇرمەتىنە يە بولدى. ونىڭ ەڭبەكتەرى عىلىمي قاۋىمداستىق پەن مەملەكەت تاراپىنان جوعارى باعالانىپ، ماراپاتتالدى. جۇرىمبەك سىدىقوۆتىڭ ونەگەلى ءومىرى مەن جارقىن بەينەسى حالقىمىزدىڭ جادىندا ماڭگى ساقتالادى. الماتىلىقتاردىڭ اتىنان بارشا زيالى قاۋىمدى، ستۋدەنتتەردى، عالىمنىڭ ءىزباسارلارى مەن تۋىستارىن مەموريالدى تاقتانىڭ اشىلۋىمەن شىن جۇرەكتەن قۇتتىقتايمىن»، – دەدى د.الييەۆ.
كورنەكتى عالىمدى ەسكە الۋعا ارىپتەستەرى، تۋىستارى مەن جاقىندارى، قوعام قايراتكەرلەرى، عىلىم مەن زيالى قاۋىم وكىلدەرى، ولاردىڭ ىشىندە ق ر پارلامەنتى سەناتىنىڭ مۇشەسى باقىتجان جۇماعۇلوۆ، ق ر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ، ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ رەكتورى مەيرام بەگەنتايەۆ جانە تاعى باسقالارى كەلدى.
ايتا كەتەرلىگى، جۇرىمبەك سىدىقوۆ 1940 جىلى قازاق ورتا مەكتەبىن ۇزدىك ءبىتىرىپ، ۇلى وتان سوعىسىنىڭ باستالۋىنا بايلانىستى اسكەرگە شاقىرىلعان. 1944 جىلى ءۇشىنشى اۋىر جاراقاتتان كەيىن اسكەردەن ورالىپ، قازاق تاۋ-كەن مەتاللۋرگيا ينستيتۋتىنىڭ گەولوگيالىق بارلاۋ فاكۋلتەتىنە وقۋعا تۇسەدى.
1965 جىلى ول دوكتورلىق ديسسەرتاسيا رەتىندە ءساتتى قورعاعان ورال-مۇعالجار تاۋلارى مەن مۇعالجار جازىعىنىڭ جەر استى سۋلارىن ۇزاق جىلدار بويى زەرتتەۋ ناتيجەلەرى بويىنشا ىرگەلى مونوگرافيا جازدى. 35 مونوگرافيا، گيدروگەولوگيالىق عىلىمنىڭ ءتۇرلى باعىتتارى بويىنشا 720 جۇمىستى جاريالادى.
گيدروگەولوگيا جانە گەوەكولوگيا ينستيتۋتىندا جۇرىمبەك سىدىقوۆ جاساعان 124 ەسەپ جانە كارتالار بار. ونىڭ جەتەكشىلىگىمەن 11 دوكتورلىق جانە 25 كانديداتتىق ديسسەرتاسيا قورعالدى.
ۇلى وتان سوعىسى جىلدارىنداعى اسكەري ەرلىگى ءۇشىن، سونداي-اق جەمىستى عىلىمي قىزمەتى مەن عىلىمي كادرلاردى دايارلاعانى ءۇشىن ءبىرىنشى دارەجەلى وتان سوعىسى وردەنىمەن، حالىقتار دوستىعى وردەنىمەن جانە قازاقستان رەسپۋبليكاسىنىڭ 20-دان استام مەدالدارىمەن جانە باسقا دا قۇرمەتتى ناگرادالارمەن ماراپاتتالعان.
عىلىم مەن تەحنيكا سالاسى بويىنشا قازاق كسر مەملەكەتتىك سىيلىعىنا، «قازاق كسر ەڭبەك سىڭىرگەن عىلىم قايراتكەرى» قۇرمەتتى اتاعىنا، اكادەميك ق.ي. ساتبايەۆ اتىنداعى سىيلىققا، قازاقستان رەسپۋبليكاسى ۇلتتىق عىلىم اكادەمياسىنىڭ ۇلكەن التىن مەدالىنە يە بولعان.