ساياباق جيھازدارى مەن سۋبۇرقاقتاردى كۇتىپ ۇستاۋ تالاپتارى
الماتى قالاسىندا ءقاۋىپسىز، ىڭعايلى جانە ەكولوگيالىق قولايلى قالالىق ورتانى قۇرۋ ماقساتىندا كورىكتەندىرۋدىڭ جاڭا ەرەجەسى ەنگىزىلدى. بۇل جاڭا ەرەجە ساياباق جيھازدارىن، قورشاۋلار مەن سۋبۇرقاقتاردى كۇتىپ ۇستاۋدى قاتاڭ تالاپ ەتەدى، دەپ حابارلايدى almaty-akshamy.kz
الماتى كوممۋنالدىق ينفراقۇرىلىمدى دامىتۋ باسقارماسىنىڭ باسشىسى دۋلات اشكەنوۆ اتاپ وتكەندەي، جاڭا ەرەجەدە بۇرىن بولماعان نورمالار بار. باۋ-باقشا جيھازدارى، مۇسىندەر مەن شاعىن ساۋلەت نىساندارى تازا ءارى جارامدى كۇيدە بولۋى ءتيىس.
"كوكتەمگى ۋاقىتتا شاعىن ساۋلەت نىساندارى تەكسەرىلىپ، تازارتىلدى، بويالىپ، سىنعان ەلەمەنتتەرى اۋىستىرىلدى. قورشاۋلار مىندەتتى تۇردە تەكسەرىلەدى جانە ءتيىستى تەحنيكالىق جاي-كۇيگە كەلتىرىلەدى، قاجەت بولسا سىرلانادى. سونىمەن قاتار، سۋبۇرقاقتار جۇمىس ىستەگەن كەزدە كۇندەلىكتى تازارتىلادى،" - دەدى دۋلات اشكەنوۆ.
كورىكتەندىرۋ جۇمىستارىن قالا اكىمدىگىنىڭ قۇرىلىمدىق بولىمشەلەرى، اۋماقتى اباتتاندىرۋدى، كۇتىپ ۇستاۋدى جانە پايدالانۋدى جۇزەگە اسىراتىن جەكە جانە زاڭدى تۇلعالار قامتاماسىز ەتەدى. الماتى اكىمدىگى مەگاپوليس اۋماعىن كورىكتەندىرۋ جانە جيناۋدى ۇيىمداستىرۋ ماسەلەسى بويىنشا جەكە جانە زاڭدى تۇلعالاردىڭ قىزمەتىن ۇيلەستىرەدى.
الماتى قالاسى قوعامدىق كەڭەسىنىڭ مۇشەسى بوريس جاپاروۆ جاڭا كورىكتەندىرۋ ەرەجەسىن قولدايدى. ونىڭ ايتۋىنشا، جاڭا وزگەرىستەر شاھار تۇرعىندارىنىڭ جاۋاپكەرشىلىك دەڭگەيىن ارتتىرۋعا مۇمكىندىك بەرەدى.
"كوپتەگەن الماتىلىق قالانىڭ سىرتقى كەلبەتىنە شاعىمدانادى. الايدا ءبىزدىڭ شاھاردى كورىكتەندىرۋدىڭ دامۋى جاۋاپتى ورگاندارعا عانا بايلانىستى ەمەس. بىرىنشىدەن، بۇل ءار تۇرعىننىڭ جاۋاپكەرشىلىگى،" - دەدى ساراپشى.
ەستەرىڭىزگە سالا كەتەيىك، 2024 جىلدىڭ 19 شىلدەسىندە VIII سايلانعان ءماسليحاتتىڭ كەزەكتەن تىس XXI سەسسياسىندا دەپۋتاتتار الماتى قالاسىنىڭ اۋماعىن كورىكتەندىرۋدىڭ جاڭا ەرەجەسىن بەكىتتى. بۇل شارالار "تازا قازاقستان" رەسپۋبليكالىق اكسياسىنىڭ ماقساتىنا سايكەس كەلەتىن ءقاۋىپسىز، ىڭعايلى ءارى ەكولوگيالىق جايلى قالالىق ورتا قۇرۋعا باعىتتالعان.