16 تامىزدا الماتىدا قازاقستان حالقى اسسامبلەياسىنىڭ 30 جىلدىعىنا وراي MEGA Alma-Ata ساۋدا-ويىن-ساۋىق ورتالىعىندا ءداستۇرلى كورەي مادەنيەتىنىڭ كۇنى ۇيىمداستىرىلدى. بۇل مەرەكە بيىل 36-شى رەت ءوتىپ وتىر. شاراعا 5 مىڭنان اسا قوناق جينالىپ، قالانىڭ ەڭ جارقىن مادەني وقيعالارىنىڭ بىرىنە اينالدى.
قوناقتارعا العاشقى بولىپ قۇتتىقتاۋ ءسوزىن الماتى قالالىق ءماسليحاتىنىڭ دەپۋتاتى، «شين-لاين» كومپانيالار توبىنىڭ پرەزيدەنتى، «الماتى كورەي ۇلتتىق ورتالىعى» قب ءتوراعاسى اندرەي انتونوۆيچ شين جولدادى. ول كورەي مادەنيەتىنىڭ كۇنى العاش رەت 1989 جىلى وتكەنىن جانە سودان بەرى جىل سايىن الماتىلىقتار مەن قالا قوناقتارىن بىرىكتىرىپ، كورەي حالقىنىڭ تاريحىنا، ونەرى مەن داستۇرلەرىنە قۇرمەت كورسەتۋگە سەبەپشى بولىپ كەلە جاتقانىن اتاپ ءوتتى.
قازاقستان حالقى اسسامبلەياسىنىڭ ەتنومادەني بىرلەستىگى بولىپ سانالاتىن الماتى كورەي ۇلتتىق ورتالىعى بۇگىندە 1200-دەن اسا مۇشەنى جانە 31 قۇرىلىمدىق بولىمشەنى بىرىكتىرەدى. ورتالىق ءار جىلى وتەتىن بۇل شاراعا الماتىلىقتار مەن قالا قوناقتارىن شاقىرىپ، ۇلتارالىق تاتۋلىقتى نىعايتۋعا، مادەنيەتارالىق ديالوگتى دامىتۋعا جانە كورەي مادەنيەتىن ناسيحاتتاۋعا ۇلەس قوسىپ كەلەدى.
كورەي مادەنيەتىنىڭ كۇنى – كورەي ەتنوسىنىڭ باي ءداستۇرىن، ءتىلىن جانە بىرەگەيلىگىن جاس ۇرپاققا جەتكىزۋگە ارنالعان جارقىن مەرەكە. بۇل شارا ءتۇرلى ۇلت وكىلدەرى اراسىنداعى سىيلاستىق پەن بىرلىكتى نىعايتۋعا ۇلكەن ىقپال ەتەدى.
مەرەكە اياسىندا الماتى كورەي ۇلتتىق ورتالىعىنىڭ شىعارماشىلىق ۇجىمدارى، وڭتۇستىك كورەيانىڭ «تەوۋلليم» تەاترىنىڭ ارتىستەرى مەن كورەيا رەسپۋبليكاسىنىڭ «چونگسونگ اريرانگ» مادەني قورىنىڭ ونەرپازدارى ۇلتتىق بي، اۋەن جانە كونسەرتتىك باعدارلاماسىن ۇسىندى.
سالتاناتتى شاراعا مەملەكەتتىك جانە ديپلوماتيالىق ورگانداردىڭ وكىلدەرى، كورەيا رەسپۋبليكاسىنىڭ الماتىداعى باس كونسۋلى جانە كانۆوندو پروۆينسياسىنىڭ گۋبەرناتورى قۇرمەتتى قوناق رەتىندە قاتىستى.
كەلۋشىلەر قازاقستانداعى كورەي حالقىنىڭ تاريحىمەن جانە مادەني مۇراسىمەن جاقىنىراق تانىسۋعا مۇمكىندىك الدى.
كورەي مادەنيەتىنىڭ كۇنى تاعى دا ەلدەگى حالىقتار اراسىنداعى دوستىقتى، ءوزارا تۇسىنىستىك پەن مادەني بايلانىستى نىعايتۋدىڭ ماڭىزدى الاڭى ەكەنىن دالەلدەدى.