كورمەگە ق ر ۇلتتىق كىتاپحاناسىنىڭ قورىنان 1500-گە جۋىق باسىلىم قويىلدى.
الماتىداعى ق ر ۇلتتىق كىتاپحاناسىندا كونستيتۋسيا كۇنىنە ارنالعان كەڭ اۋقىمدى «كونستيتۋسيا – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى بەزەندىرىلگەن كىتاپ كورمەسى اشىلدى، دەپ حابارلايدى Almaty-akshamy.kz.
كورمەگە تاۋكە حاننىڭ تۇسىندا قابىلدانعان «جەتى جارعى»، قازاق حالقىنىڭ ءداستۇرلى ادەپ-عۇرىپ زاڭدارىنىڭ جيناعى: مەملەكەت تاريحى مەن قۇقىعى تۋرالى ادەبيەتتەر قويىلدى. «مادەني-مۇرا» مەملەكەتتىك باعدارلاماسى اياسىندا جاريالانعان «قازاقتىڭ اتا زاڭدارى» قۇجاتتار مەن ماتەريالدار جيناعى دا ۇسىنىلدى.
«كورمەدە تانىمال زاڭگەر، وتاندىق زاڭ عىلىمىنىڭ دامۋىنا، قۇقىقتىق مەملەكەتتىڭ قالىپتاسۋىنا، تاۋەلسىز ەلىمىزدىڭ وركەندەۋىنە ايتارلىقتاي ۇلەس قوسىپ، زاڭ عىلىمىنىڭ بارلىق سالالارى بويىنشا زەرتتەۋلەر مەن مونوگرافيالار جازعان زاڭ عىلىمى مەن ءبىلىمىنىڭ دامۋىنا ايرىقشا سەرپىن بەرگەن زيالى تۇلعالار باسىلىمدارىنا ەرەكشە ورىن بەرىلگەن»، - دەدى ق ر ۇلتتىق كىتاپحانا قىزمەتكەرى جانار ابدىكەرىموۆا.
مۇنداي باسىلىمدار اۆتورلارىنىڭ قاتارىندا س.زيمانوۆ، س.سارتايەۆ، ق.مامي، ي.روگوۆ، س.سابيكەنوۆ، ت.كۇلتولەيەۆ، ع.ساپارعالييەۆ، گ.تايمانوۆ، ءا.ەرەنوۆ، س.بايسالوۆ، ش.شايبەكوۆ، ن.مۇحيددينوۆ، س.ساحيپوۆ، م.بايماحانوۆ، م.سۇلەيمەنوۆ، م.نارىكبايەۆ، ۋ.جەكەبايەۆ، ت.اعداربەكوۆ، ق.حاليقوۆ، س.تابانوۆ، ن.وسەر ۇلى، ز.كەنجالي، س.وزبەك ۇلى، ا.يبرايەۆا بار.
ۇلتتىق كىتاپحانا قىزمەتكەرىنىڭ ايتۋىنشا، كونستيتۋسيا قازاقستان حالقىنا ەڭ باستىسى - تاڭداۋ قۇقىعىن بەردى.
«اتا زاڭ – ءبىزدىڭ كۇندەلىكتى ءجۇرىس-تۇرىسىمىزدى رەتتەيتىن، قاۋىپسىزدىگىمىزدى قامتاماسىز ەتىپ، ەل بولاشاعىنىڭ جارقىن بولۋى ءۇشىن قوعامداعى كەلىسىم مەن ءتارتىپتى ساقتايتىن ەڭ ماڭىزدى قۇجات. مەملەكەتىمىزدىڭ دامۋىنا ۇلەس قوسقىسى كەلەتىن ازامات سول قۇجاتقا مويىنسۇنىپ، ونى قۇرمەتتەمەيىنشە، ەلدىڭ دامۋىن ويلاۋ مۇمكىن ەمەس. ءاربىر ازامات ونى قادىرلەپ- قاستەرلەۋگە، ارداق تۇتۋعا مىندەتتى»،- دەيدى ول.