الماتىدا كامەلەتكە تولماعاندار اراسىنداعى قۇقىقبۇزۋشىلىقتاردىڭ الدىن الۋعا باعىتتالعان تۇنگى پروفيلاكتيكالىق رەيد ءوتتى. مونيتورينگ بارىسىندا تۇنگى ۋاقىتتا جاسوسپىرىمدەردىڭ بارۋى مۇمكىن كومپيۋتەرلىك كلۋبتارعا ەرەكشە نازار اۋدارىلدى. بۇل تۋرالى الماتى قالاسىنىڭ جاستار ساياساتى باسقارماسىنىڭ وكىلدەرى ايتتى.
مونيتورينگتى قالالىق كوميۋنيتي ورتالىقتاردىڭ رەزيدەنتتەرى مەن قوعام وكىلدەرى الماتى قالاسى پوليسيا دەپارتامەنتىمەن بىرلەسىپ ۇيىمداستىردى. ءىس-شارانىڭ ماقساتى — كامەلەتكە تولماعانداردىڭ كەشكى جانە تۇنگى ۋاقىتتا قوعامدىق ورىنداردا بولۋىن رەتتەيتىن زاڭناما تالاپتارىنىڭ ساقتالۋىن باقىلاۋ، سونداي-اق جاستار اراسىنداعى قۇقىقبۇزۋشىلىقتاردىڭ الدىن الۋ.
رەيد اياسىندا Lord، BRO، Vernyi، DarkNet جانە وزگە دە كومپيۋتەرلىك كلۋبتار تەكسەرىلدى. مونيتورينگ قورىتىندىسى بويىنشا زاڭدى وكىلسىز جۇرگەن كامەلەتكە تولماعاندار انىقتالعان جوق.
«رەيد بارىسىندا پوليسيا قىزمەتكەرلەرى كومپيۋتەرلىك كلۋبتاردا زاڭدى وكىلسىز جۇرگەن بىردە-بىر ءجاسوسپىرىمدى انىقتاعان جوق. مۇنداي فاكتىلەر تىركەلگەن جاعدايدا كامەلەتكە تولماعاندار الماتى قالاسىنىڭ اۋەزوۆ اۋدانى پوليسيا باسقارماسىنا جەتكىزىلىپ، اتا-انالارى نەمەسە قامقورشىلارى شاقىرىلاتىن ەدى. ال 22:00-دەن كەيىن جاسوسپىرىمدەردىڭ بولۋىنا جول بەرگەن مەكەمە يەلەرى اكىمشىلىك جاۋاپكەرشىلىككە تارتىلادى»، — دەدى الماتى قالاسى اۋەزوۆ اۋدانى كوميۋنيتي ورتالىعىنىڭ ديرەكتورى باۋىرجان ماحانبەت.
سونداي-اق، ول كومپيۋتەرلىك كلۋبتاردا، قوعامدىق كەڭىستىكتەردە جانە ساۋدا-ويىن-ساۋىق ورتالىقتارىندا پروفيلاكتيكالىق رەيدتەر اي سايىن، تۇراقتى تۇردە وتكىزىلەتىنىن اتاپ ءوتتى.
«وتكەن جىلمەن سالىستىرعاندا قاڭتار ايى وڭ كورسەتكىشپەن باستالدى، قۇقىقبۇزۋشىلىق تىركەلگەن جوق. دەگەنمەن كامەلەتكە تولماعاندار مەن ولاردىڭ اتا-انالارىنا نەمەسە زاڭدى وكىلدەرىنە جاۋاپكەرشىلىكتى ۇنەمى ەسكە سالۋ ماڭىزدى»، — دەدى ول.
ەسكە سالايىق، قازاقستان رەسپۋبليكاسىنىڭ زاڭناماسىنا سايكەس، كامەلەتكە تولماعاندارعا 23:00-دەن 06:00-گە دەيىن زاڭدى وكىلسىز تۇرعىن ۇيدەن تىس جەردە بولۋعا تىيىم سالىنادى. سونداي-اق، قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 442-بابىنا سايكەس، 22:00-دەن 06:00-گە دەيىن ويىن-ساۋىق مەكەمەلەرىندە كامەلەتكە تولماعانداردىڭ زاڭدى وكىلسىز جۇرۋىنە تىيىم سالىنادى.