14 ەلدەن 350-دەن استام دەلەگات قاتىسۋدا.
الماتىدا «NEW SILK WAY» V حالىقارالىق كولىكتىك-لوگيستيكالىق بيزنەس فورۋمى ءوز جۇمىسىن باستادى، دەپ حابارلايدى Almaty-akshamy.kz Egemen.kz سىلتەمە جاساپ.
قازاقستاننىڭ كولىك اپتالىعى شەڭبەرىندە ۇيىمداستىرىلعان القالى باسقوسۋعا 14 ەلدەن 350-دەن استام دەلەگات قاتىسۋدا.
ەلىمىزدىڭ ترانزيتتىك الەۋەتى مەن ينۆەستيسيالىق تارتىمدىلىعىن ارتتىرۋ ماقساتىنداعى فورۋم جۇمىسى «قازىرگى جاعدايداعى كولىكتىك-لوگيستيكالىق الەۋەتتى دامىتۋ» پانەلدىك سەسسياسىمەن اشىلدى.
جيىندى يندۋستريا جانە ينفراقۇرىلىمدىق دامۋ ۆيسە-مينيسترى الماز ىدىرىسوۆ اشىپ، قازاقستاننىڭ قازىرگى گەوساياسي جاعدايداعى ازيا مەن ەۋروپا اراسىنداعى ماڭىزدى قۇرلىق ءدالىزى ەكەنىن ايتتى.
«بۇگىندە ەلىمىزدە كولىك دالىزدەرىنىڭ تارماقتالعان جەلىسى بار. قازاقستاننىڭ الەمدىك نارىققا شىعۋعا مۇمكىندىك بەرەتىن نەگىزگى حالىقارالىق كولىك جەلىلەرىمەن بايلانىسى وتە تىعىز. قولدانىستاعى ترانزيتتىك باعىتتاردى دامىتۋ جانە جاڭالارىن قۇرۋ، لوگيستيكالىق ينفراقۇرىلىمدى جاڭعىرتۋ ءبىزدىڭ ەلدەر ءۇشىن ءتيىمدى جانە وسى تاراپتاعى جۇمىستى ودان ارمەن جالعاستىرۋ وتە ماڭىزدى»،- دەپ اتاپ ءوتتى ۆيسە-مينيستر.
قازاقستان «باتىس ەۋروپا – باتىس جۇڭگو» ترانزيتتىك كولىك ءدالىزى، ليانيۋنگان تەڭىز پورتىنداعى (قحر) لوگيستيكالىق تەرمينال، «قورعاس-شىعىس قاقپاسى» اەا سىندى جوبالاردى تابىستى جۇزەگە اسىردى. سونداي-اق قازىرگى كۇندە ترانسكاسپيي حالىقارالىق كولىك باعىتى نەگىزىندە تەڭىز پورتتارى ارقىلى كونتەينەرلىك تاسىمالداۋ كولەمىن ارتتىرۋ بويىنشا جۇمىستار جالعاسۋدا. وسىعان وراي اقتاۋ تەڭىز پورتى بازاسىندا كونتەينەرلىك حاب قۇرىلادى.
«كونتەينەرلىك حابتى قۇرۋ جوباسى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنا ەنگىزىلدى. جوبانىڭ جالپى قۇنى 10،4 ملرد تەڭگەنى قۇرايدى. ونى ىسكە اسىرۋ ترانسكاسپيي حالىقارالىق كولىك باعىتى بويىنشا جۇكتەردى تاسىمالداۋ جىلدامدىعىن جانە تۇركمەنباشى – اقتاۋ – جۇڭگو ترانزيتتىك ءدالىزىنىڭ وتكىزۋ قابىلەتىن دامىتۋعا مۇمكىندىك بەرمەك»، -دەدى ءوز سوزىندە الماز ىدىرىسوۆ.
جوبا ناتيجەسىندە 2025 جىلعا قاراي اقتاۋ تەڭىز پورتى ارقىلى جۇك تاسىمالداۋ كولەمى 40 مىڭنان 133 مىڭ جيىرما فۋتتىق ەكۆيۆالەنتكە ارتپاق. بۇدان بولەك، لوگيستيكالىق مارشرۋتتاردى جالعايتىن 10 پاروم، 18 جۇك تيەۋ تانكەرىنە ارنالعان فلوت قۇرىلىسىن جۇزەگە اسىرۋ جۇمىستارى قولعا الىنۋدا.
سونىمەن قاتار داربازا – ماقتاارال تەمىر جول جەلىسىنىڭ قۇرىلىسى مەن دوستىق – مويىنتى تەمىر جول ءدالىزىن جاڭعىرتۋ جوباسىن ىسكە اسىرۋ جوسپارلانىپ وتىر. بۇل جوبالاردى ىسكە اسىرۋ رەسەي – ورتالىق ازيا، جۇڭگو – ەۋروپا ترانزيتتىك باعىتتارى بويىنشا جۇكتەردى تاسىمالداۋ جىلدامدىعىن بىرنەشە ەسەگە ارتتىرۋعا مۇمكىندىك بەرمەك. وسى رەتتە ايتا كەتەرلىگى، جىل باسىنان بەرى جۇڭگو – ەۋروپا – جۇڭگو باعىتىنداعى ترانزيتتىك كونتەينەرلىك جۇكتەر اعىنى وتكەن جىلدىڭ سايكەس كەزەڭىمەن سالىستىرعاندا 4 پايىزعا ارتىپ، 499 مىڭ جفە-نى قۇرادى.
قازىرگى ۋاقىتتا ەلىمىزدە ترانسپورتتىق ينفراقۇرىلىمدى جاڭعىرتۋ جۇمىستارى قارقىندى جۇرگىزىلۋدە. ق ر ييدم ۆيسە-مينيسترىنىڭ ايتۋىنشا، بارلىق كولىك دالىزدەرىندەگى قۇرىلىس جۇمىستارى 2030 جىلعا قاراي تولىق اياقتالادى.
سونىمەن قاتار فورۋمدا كولىك سالاسىنداعى جاڭا مۇمكىندىكتەر، حالىقارالىق اۆتوموبيل تاسىمالدارى، تەڭىز جانە تەمىرجول لوگيستيكاسى مەن سالادا كادرلار دايارلاۋ ماسەلەلەرى تالقىلاندى.
ەكى كۇنگە جالعاساتىن حالىقارالىق كولىك-لوگيستيكالىق بيزنەس فورۋمى اياسىندا «كولىك جانە لوگيستيكا» قازاقستاندىق حالىقارالىق كورمەسى دە وتەدى.