الماتى قالالىق پوليسيا دەپارتامەنتىنىڭ مالىمەتىنشە، كولىك قۇرالىن باسقارۋ قۇقىعىنان ايىرىلسا دا، كولىك تىزگىنىنە وتىرعان جۇرگىزۋشىنى ىزدەۋدىڭ جاڭا تەحنولوگياسى پايدا بولدى، دەپ حابارلايدى almaty-akshamy.kz
«بۇگىندە ەلدە جول-كولىك وقيعالارىنىڭ الدىن الۋ مەن جول قاۋىپسىزدىگىن قامتاماسىز ەتۋگە ەرەكشە كوڭىل ءبولىپ جاتىر. زاڭ دەڭگەيىندە كولىكتى ماس كۇيىندە باسقارعانى ءۇشىن جاۋاپكەرشىلىك كۇشەيتىلدى. ەندى بۇل قۇقىقبۇزۋشىلىق ءۇشىن 7 جىل مەرزىمگە كولىك باسقارۋ قۇقىعىنان ايىرۋ، سونداي-اق 15 تاۋلىككە اكىمشىلىك قاماۋعا الۋ قاراستىرىلعان. وكىنىشكە وراي، ءىس جۇزىندە سوت جۇرگىزۋشى كۋالىگىنەن ايىرعان جۇرگىزۋشى ءوزى ءۇشىن ءتيىستى قورىتىندى جاساماي، ماس كۇيىندە قايتادان رولگە وتىراتىن جاعداي ءجيى كەزدەسەدى. ال مۇنداي نەمقۇرايدىلىق قايعىلى جاعدايعا اكەلۋى مۇمكىن»، – دەدى الماتى قالالىق پوليسيا دەپارتامەنتىنىڭ باستىعى قانات تايمەردەنوۆ.
وسىعان وراي، الماتى پوليسياسىنىڭ الدىڭعى قاتارداعى بولىمشەلەرىنىڭ جەكە قۇرامى جول قوزعالىسىنا قاتىسۋشىلارعا ناقتى ءقاۋىپ توندىرەتىن بۇزۋشىلاردى انىقتاۋعا جانە ۇستاۋعا جۇمىلدىرىلعان. پوليسيادا ىسكە قوسىلعان جاڭا قىزمەت كولىك قۇرالىن بەينەتىركەۋ جۇيەسى ارقىلى انىقتاعاننان كەيىن، ونى جەدەل ۇستاۋ جانە توقتاتۋ ءۇشىن پاترۋلدىك جاساقتارعا دەرەكتەردى بەرۋگە مۇمكىندىك بەرەدى.
«جازانىڭ بۇلتارتپاس قاعيداسى تۋرالى تاعى ءبىر ەسكە سالعان ءجون. بۇگىندە پوليسيا ادامي فاكتوردى جويىپ، ءتارتىپ بۇزۋشىلاردى انىقتاۋعا، ولاردىڭ زاڭسىز ارەكەتتەرىن ەسەپكە الۋعا جانە جاۋاپقا تارتۋعا مۇمكىندىك بەرەتىن اۆتوماتتاندىرىلعان جۇيەلەرمەن جابدىقتالعان. جىل باسىنان 1،5 مىڭنان استام جۇرگىزۋشى كولىكتى ماس كۇيىندە باسقارعانى ءۇشىن سوت كولىك ايداۋ قۇقىعىنان ايىردى، ونىڭ 245ء-ى ماس كۇيىندە جول-كولىك وقيعاسىن جاسادى، تاعى 168ء-ى جۇرگىزۋشى كۋالىگىنەن ايىرىلعان بولسا دا، ماس كۇيىندە رولگە وتىرعان»، – دەپ تۇيىندەدى قانات تايمەردەنوۆ.
سونىمەن قاتار، الماتى قالالىق پد كولىك كۇرالىن باسقارۋ قۇقىعىنان ايىرىلا وتىرىپ، كولىكتى ايداۋ قىلمىستىق جاۋاپقا اكەپ سوعاتىنىن ەسكەرتەدى.