الماتىدا ناۋرىز مەيرامى كورىسۋ كۇنىن تويلاۋدان باستالدى
مەرەكەلىك كونسەرت ساحناسىندا «كەشYou»، توبى، ءمولدىر اۋەلبەكوۆا، ايدار تۇرعانبەك جانە «الاش ۇلى» ۇجىمى ونەر كورسەتتى. ءىس-شارانى «جاڭا كۇن» پرولوگىمەن «الاتاۋ» ءداستۇرلى ونەر تەاترىنىڭ ارتىستەرى اشتى، دەپ حابارلايدى Almaty-akshamy.kz.
كەلۋشىلەر ءداستۇر بويىنشا ءبىر-بىرىن كوكتەمنىڭ باستالۋىمەن قۇتتىقتاپ، جاقسى تىلەكتەر ايتتى.
مەرەكە بي جانە كۇيمەن كومكەرىلىپ، بارلىق قوناققا باۋىرساق پەن ناۋرىز كوجە ۇسىنىلدى.
كورىسۋ – ناۋرىز مەيرامىمەن ۇشتاسىپ جاتقان مەرەكەنىڭ ءبىرى. بۇل كۇندى حالقىمىز وكپە-رەنىشتەن قۇتىلىپ، قىستان امان-ەسەن شىققان كۇن رەتىندە اتاپ وتەدى. حالقىمىز كوكتەمگە اياق باسقاننىڭ قۇرمەتىنە باس قوسىپ، قاۋىشۋدى قۇپ كورگەن. بۇل كۇن كەشىرىم كۇنى دەپ تە اتالادى. ماڭعىستاۋ ءوڭىرىنىڭ جۇرتى ونى امال مەرەكەسى دەيدى.
