الماتى قالاسىنىڭ اكىمى دارحان ساتىبالدىنىڭ توراعالىعىمەن «تازا قازاقستان» جالپىرەسپۋبليكالىق ەكولوگيالىق اكسياسىنىڭ جۇزەگە اسىرىلۋ بارىسىنا ارنالعان جۇمىس كەڭەسى ءوتتى.
قالا اكىمى ەكولوگيا مەن اباتتاندىرۋ ماسەلەسىنە جۇيەلى تۇردە قاراۋدىڭ ماڭىزىن اتادى. وسىعان وراي، قالا اۋماعىن كوگالداندىرۋمەن، سانيتارلىق تازالىقپەن جانە جايلى قالالىق ورتانى قالىپتاستىرۋمەن اينالىساتىن جاڭا ارنايى كاسىپورىن قۇرۋ تاپسىرىلدى.
«بۇل قۇرىلىم تەك كوگالداندىرۋ مەن اباتتاندىرۋعا، قالادا جايلى ورتا قۇرۋعا جاۋاپتى بولۋعا ءتيىس. ولار وزدەرى جەرگىلىكتى جەرلەرگە شىعىپ، جاعدايدى جاقسارتۋعا بولاتىن اۋماقتاردى انىقتاۋى قاجەت»، — دەدى دارحان ساتىبالدى.
كەڭەستە «تازا قازاقستان» اكسياسىنىڭ ارالىق قورىتىندىسى دا قارالدى. ءۇشىنشى توقسان باستالعالى بەرى الماتىدا 3 مىڭنان استام ادامنىڭ قاتىسۋىمەن 30-عا جۋىق ءىس-شارا وتكىزىلدى.
تۇرعىندارمەن بايلانىستىڭ ءتيىمدى قۇرالى رەتىندە TazaQazBot سيفرلىق پلاتفورماسى جۇمىسىن جالعاستىرۋدا. جىل باسىنان بەرى وسى بوت ارقىلى تۇرعىنداردان 4 مىڭنان استام ءوتىنىش تۇسكەن.
تالقىلاۋ بارىسىندا قالانىڭ جاسىل قورىن كۇتىپ-باپتاۋ جايى دا ءسوز بولدى. تۇگەندەۋ كەزىندە 16 مىڭنان استام قۋراعان جانە اپاتتى جاعدايداعى اعاش انىقتالىپ، ولاردىڭ 5 مىڭنان استامى كەسىلدى. سونىمەن قاتار سانيتارلىق ماقساتتا بۇتاقتارىن كەسۋ، بۇتا وتىرعىزۋ جانە بۋفەرلىك جاسىل ايماقتاردى اباتتاندىرۋ جۇمىستارى قاتار جۇرگىزىلىپ جاتىر.
باستى ماسەلەنىڭ ءبىرى — اۆتوماتتى سۋارۋ جۇيەلەرىنىڭ جۇمىسقا جارامدىلىعى. مونيتورينگ بارىسىندا 56 ۋچاسكەدە اقاۋلار انىقتالىپ، بۇل كوپجىلدىق جاسىل جەلەكتەردىڭ جاعدايىنا تىكەلەي اسەر ەتىپ وتىر. وسىعان بايلانىستى اكىم جۇيەلەردىڭ ۇزدىكسىز جۇمىسىن باقىلاۋدى كۇشەيتىپ، جاسىل ايماقتاردى ساپالى كۇتىپ-باپتاۋدى قامتاماسىز ەتۋدى تاپسىردى.
كەڭەس قورىتىندىسى بويىنشا شاھار باسشىسى بەكىتىلگەن جوسپارعا سايكەس ءىس-شارالاردى بۇلجىتپاي ورىنداۋ، تۇرعىنداردىڭ ەكولوگيالىق ساۋاتىن ارتتىرۋ باعىتىنداعى جۇمىستى جانداندىرۋ جانە كاسىپورىندار مەن ۇيىمداردىڭ، قالا تۇرعىندارىنىڭ كوپتەپ قاتىسۋىمەن سەنبىلىكتەردى جۇيەلى تۇردە وتكىزۋ سىندى بىرنەشە ناقتى تاپسىرما بەردى.