قازاقستان مەن وڭتۇستىك كورەيانىڭ ديپلوماتيالىق قارىم-قاتىناسىنىڭ 30 جىلدىعىنا وراي، كورەيا حالىقارالىق مادەني الماسۋ اگەنتتىگى مەن كورەيلىك قارجى توبى - «Shinhan Card» كومپانياسىمەن بىرلەسىپ قازاقستانداعى «كيمەپ» ۋنيۆەرسيتەتىندە شاعىن كورەي كىتاپحاناسىن اشتى، دەپ حابارلايدى Almaty-akshamy.kz.
بۇل مادەني جانە ءبىلىم جوباسى ەكى ەلدىڭ اراسىنداعى ديپلوماتيالىق قارىم-قاتىناستىڭ 30 جىلدىعىنا بايلانىستى ۇيىمداستىرىلىپ وتىر. ۋنيۆەرسيتەت قابىرعاسىندا كىتاپحانانىڭ اشىلۋى سالتاناتتى تۇردە ءوتتى.
ەكى ۇيىم كيمەپ ۋنيۆەرسيتەتىندەگى كىتاپحاناعا ارنالعان ورىندى جوندەپ، كىتاپ تۇراتىن جاڭا شكاف، جاڭا ۇستەل جانە ورىندىقتارمەن قامتاماسىز ەتتى. كىتاپحانا ءىشى كورەيلىك ديزاينمەن جاسالعان. كورەي ادەبيەتىنىڭ اۋدارمالارى، كورەي ءتىلىن ۇيرەنۋگە ارنالعان كىتاپتاردى سىيعا تارتتى. سىيعا تارقان كىتاپ سانى 1500 دانا. الداعى ۋاقىتتى جاڭا كورەيلىك كىتاپحانا جاستاردىڭ يگىلىگىنە جۇمىس جاسايدى. كىتاپحاناعا كورەي تىلىندە «ارىم ين» دەگەن ات بەرىلدى. ماعىناسى «ادەمى ادام» دەگەن ءسوز. ياعني، كىتاپ وقىعان ادامدار رۋحاني ادەمى جاندار دەگەن ءسوز. كىتاپحانا ىشىندەگى كىتاپتار اعىلشىن جانە كورەي تىلىندە باسىلىپ شىققان كىتاپتار. بارلىعى دەرلىك سوڭعى كەزدە جارىق كورگەن جاڭا كىتاپتار. مىسالى، اتاپ ايتساق، كورەي تاريحى، مادەنيەتى، ونەرى، ءتىلى جانە سوڭعى الەمدىك «حالليۋ فەنومەنى» دەگەن اتپەن كوپشىلىككە جاقىن تانىس «K-POP» جانە «K-Drama» تۋرالى كىتاپتار دا بار. ستۋدەنتتەر اعىلشىن جانە كورەي تىلىندەگى وسى كىتاپتاردى وقي الادى. سونىمەن قاتار، بولاشاقتا جينالىپ، اۋماعى شاعىن كىتاپحانا ىشىندە ءتۇرلى مادەني شارالار مەن كەزدەسۋلەر دە وتكىزە الادى. «كىتاپ ماعان تاقتان دا قىمبات» دەپ ۋيليام شەكسپير ايتپاقشى، كىتاپحاناداعى ءاربىر باعالى كىتاپ ستۋدەنتتەرگە پايدالى اقپارات بەرەدى دەپ ۇمىتتەنەمىز.
اشىلۋ سالتاناتىندا قۇتتىقتاۋ ءسوز سويلەگەن ديرەكتور چون گيل-حۆا: «كىتاپحانانىڭ اشىلۋى – كيمەپ ۋنيۆەرسيتەتىندەگى كورنەكتى جاس تالانتتار ءۇشىن بولاشاققا باعىتتالعان ينۆەستيسيا»، - دەدى.
ودان باسقا «Shinhan Card»-تىڭ باس ديرەكتور دونگ-گۆون مۋن مىرزا، كيمەپ ۋنيۆەرسيتەتىنىڭ پرەزيدەنتى دوكتور چان يان بەنگ مىرزا جانە ءبىرقاتار قۇرمەتتى قوناقتار ءسوز سويلەدى.
قازىرگى كەزدە قازاقستان اۋماعىندا 120 000-عا جۋىق جەرگىلىكتى كارىستەر تۇرادى. قازاقستاننىڭ 14 ۋنيۆەرسيتەتى، مادەني جانە وقۋ ورتالىقتارىندا كورەي ءتىلى ۇيرەتىلەدى. قازاقستان كورەي ءتىلى بويىنشا تمد ەلدەرى اراسىندا رەسەيدەن كەيىنگى ەكىنشى ورىندا.
اتاپ ايتقاندا، كورەيلىك دوكتور چان يان بەنگ قۇرعان كيمەپ ۋنيۆەرسيتەتى قازاقستانداعى امەريكاندىق ۇلگىدەگى وقۋ جۇيەسى مەن اعىلشىن تىلىندە ءبىلىم بەرۋدى ەنگىزگەن العاشقى ۋنيۆەرسيتەت. سونىمەن قاتار ورتالىق ازياداعى ەڭ ۇزدىك وقۋ ورىندارىنىڭ ءبىرى بولىپ سانالادى. پرەزيدەنتى چان يان بەنگ مىرزا دا كارىس ۇلتىنىڭ وكىلى. وسى جولى اتالمىش وقۋ ورنىندا كورەي كىتاپحاناسىنىڭ اشىلىپ، كورنەكتى وقۋ ورنىنىڭ ستۋدەنتتەرىنە كورەي مادەنيەتىمەن جاقىنىراق تانىسۋعا مۇمكىندىك جاسالدى.
وتكەن 2021 جىلى مەملەكەت باسشىسى قاسىم-جومارت توقايەۆتىڭ كورەيا رەسپۋبليكاسىنا مەملەكەتتىك رەسمي ساپارى بولدى. سونىمەن قاتار، پرەزيدەنت سەۋل قالاسىنداعى بەلگىلى وقۋ ورىندارىنىڭ ءبىرىنىڭ اۋماعىنا اباي قۇنانبايۇلىنا ورناتىلعان ءبيۋستىڭ رەسمي اشىلۋى راسىمىنە قاتىستى. وسى ساپار بارىسىندا ەكى ەلدىڭ باسشىلارى «كورەيا مەن قازاقستان ءوزارا مادەني الماسۋ جىلىن» جاريالادى. ول 2022 جىلدان 2023 جىلعا دەيىن جوسپارلانعان. سول سەبەپتى 2022 جىلدان باستاپ مادەني سالادا ەكى جىلعا ارنالعان «كورەيا مەن قازاقستان ءوزارا مادەني الماسۋ جىلى» جوباسى جوسپارلى تۇردە جۇزەگە اسىرىلۋدا.
بيىلعى جىلى مادەني جوبالار جىلدىڭ سوڭىنا دەيىن بەس سالادا جۇرگىزىلەدى. مىسالى، بەينەكونتەنت ءوندىرىسى، جاس سۋرەتشىلەر، انيماسيا، بەينەلەۋ ونەرى جانە ءداستۇرلى مادەنيەت. بەينەكونتەنتكە كەلەتىن بولساق، كورەيا ۇلتتىق ونەر ۋنيۆەرسيتەتى مەن قازاقستان قوعامدىق ونەر مەكتەبىنىڭ ستۋدەنتتەرى دەرەكتى فيلمدەردى بىرلەسىپ تۇسىرۋدە، ال جاس سۋرەتشىلەر كورەيا تەاترىمەن جانە ۇلتتىق تەاترىمەن ىسكەرلىك كەلىسىمدەردى العا جىلجىتۋدا.
الماتى مەن وڭتۇستىك كورەيانىڭ تەگۋ قالاسى – باۋىرلاس قالالار. وسىدان 32 جىل بۇرىن ازيانىڭ ايگىلى ەكى قالاسى بايلانىس ورناتىپ، باۋىرلاستىق بايلانىس جونىندەگى كەلىسىمگە 1991 جىلى قول قويدى. كورىپ وتىرعاندارىڭىزداي، الماتى كورەي ەلىنىڭ قالالارىمەن دە تاريحي بايلانىسى بار قالا. الاتاۋدىڭ باۋىرىنداعى وسىنداي ادەمى شاھاردا جاڭا كىتاپحانانىڭ اشىلۋى الماتىداي قالا جاستارى ءۇشىن وتە ماڭىزدى جوبانىڭ ءبىرى. قالانىڭ ءبىلىم قۋعان جاس تۇرعىندارى بوس ۋاقىتىندا سەرىكتەس ەلدەردىڭ مادەنيەتىمەن تانىسا الادى. وسى ايدىڭ 1ء-شى كۇنىنەن باستاپ ستۋدەنت جاستار ءۇشىن ۋنيۆەرسيتەت قابىرعاسىنداعى كىتاپحانانىڭ ەسىگى ءاردايىم اشىق.
داستان اقاش شىعىستانۋشى-كورەيتانۋشى، مەملەكەتتىك باسقارۋ مەن حالىقارالىق قارىم-قاتىناس مامانى