وڭىرلىك كوممۋنيكاسيالار الاڭىندا الماتى قالاسى قوعامدىق دەنساۋلىق ساقتاۋ باسقارماسى قالالىق قان ورتالىعىنىڭ ديرەكتورى جاندوس ءنادىروۆتىڭ قاتىسۋمەن بريفينگ ءوتتى، دەپ حابارلايدى اlmaty-akshamy.kz.
سپيكەردىڭ ايتۋىنشا، بۇگىندە الەمدىك تاجىريبەدە قان دونورلىعى مەن ونىڭ كومپونەنتتەرىن دامىتۋدىڭ ءبىرىڭعاي ستاندارتى قابىلدانعان – بۇل قان مەن ونىڭ كومپونەنتتەرىنىڭ وتەۋسىز دونورلىعىن دامىتۋ.
«دونور ءسوزى لاتىن تىلىنەن اۋدارعاندا سىيلاۋشى، ياعني قايتارىمسىز دەگەندى بىلدىرەدى. قان دونورلىعىن ناسيحاتتاۋ ماقساتىندا ددۇ 2005 جىلى 14 ماۋسىم – دۇنيەجۇزىلىك قان دونورى كۇنىن بەكىتتى. بۇل كۇنى بۇكىل الەمدە قان تاپسىرۋشىلارعا قۇرمەت كورسەتىلەدى. وسى ۋاقىتقا دەيىن الەمدە دونورلىق قان مەن ونىڭ كومپونەنتتەرىنىڭ انالوگى مەن الماستىرعىشتارى جوق، سوندىقتان دونورلىق قان مەن ونىڭ كومپونەنتتەرىنىڭ كوزى ادام بولىپ وتىر»، - دەيدى ج.ءنادىروۆ.
دونورلىق بىرنەشە تۇرگە بولىنەدى. قر-دا ونىڭ كەلەسى تۇرلەرى بار:
- 450 مل كولەمىندە تولىق قان تاپسىرۋ.
- اپپاراتتىق ادىسپەن 400-600 مل كولەمىندە قان پلازماسىن تاپسىرۋ.
قان جاسۋشالارىنىڭ دونورلىعى:
اپپاراتتىق ترومبوسيتفەرەز – كولەمى 200-300 مل بولاتىنداي 2*106-دان 8*106-عا دەيىنگى جاسۋشالاردىڭ سانىندا دونورلىق ترومبوسيتتەردى تاپسىرۋ.
اپپاراتتىق ەريتروسيتتەفەرەز – 200-دەن 500 مل-گە دەيىن دونورلىق ەريتروسيتتەردى، ەريتروسيتتەردى تاپسىرۋ.
دونورلىقتىڭ ءتۇرى مەن مولشەرىن قان ورتالىعىنىڭ دارىگەرى دونوردىڭ ءوتىنىشى بويىنشا ەمەس، اۋرۋحانالاردىڭ قاجەتتىلىكتەرىن، قان بانكىنىڭ جاعدايىن جانە دونوردىڭ فيزيكالىق مۇمكىندىكتەرىن ەسكەرە وتىرىپ انىقتايتىنىن ءبىلۋ ماڭىزدى.
ستاتيستيكاعا سايكەس، ەڭ سۇرانىسقا يە، قاجەت بوپ جاتاتىن قان توپتارى - وڭ رەزۋس فاكتورلى ءبىرىنشى جانە ەكىنشى قان توپتارى. ەڭ سيرەك كەزدەسەتىن قان تۇرلەرى – تەرىس رەزۋس فاكتورلىق بارلىق قان توپتارى.
«2020-2021 جىلدارداعى پاندەميا كەزەڭىندە مەديسينالىق ۇيىمداردا جوسپارلى مەديسينالىق كومەك كورسەتۋدەن باس تارتۋعا جانە ولاردى COVID-ستاسيونارلارعا قايتا بەيىندەۋگە بايلانىستى دونورلىق 10%-عا تومەندەدى. 2022 جىلى جاعداي كەرىسىنشە وزگەردى، قان كومپونەنتتەرىن تۇتىنۋدىڭ 10%-عا ارتۋى بايقالادى، سوعان بايلانىستى دونورلىقتىڭ دا ءدال وسىنداي 10%-عا ارتۋى بايقالدى»، - دەدى ج.ءنادىروۆ.
ماسەلەن، الماتى قالالىق قان ورتالىعىنىڭ 2021 جىلعى ستاتيستيكالىق دەرەكتەرى بويىنشا قان جانە ونىڭ كومپونەنتتەرىن تاپسىرۋ سانى 16 961 بولسا، 2022 جىلى دونورلار سانى 18 516-عا جەتكەن. پايىزدىق كورسەتكىشتە 8-9 پايىزعا وسكەن.
دونورلاردى قابىلداۋ كەستەسى: دۇيسەنبىدەن سەنبىگە دەيىن 9.00-دەن 15.00-گە دەيىن.
بايلانىس تەلەفوندارى: قابىلداۋ ءبولىمى 8 727 338 23 82، جالپى 8 727 338 23 81.