الماتىدا كىمدەر كوروناۆيرۋستى كوپ جۇقتىرادى؟

كوبىنە 20 مەن 40 جاس ارالىعىنداعى ازاماتتار ەكەن، ولاردىڭ 33%-ى وسى ىندەتكە شالدىققان.

الماتى قالاسىنىڭ باس سانيتارلىق دارىگەرى جانداربەك بەكشين وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا سوڭعى ەپيدەميولوگيالىق تەكسەرۋ ناتيجەلەرى بويىنشا ازاماتتاردىڭ 90%-ى كوروناۆيرۋسپەن اۋىراتىن ناۋقاستارمەن بايلانىستا بولعاندىقتان اۋىرعانىن ايتتى، دەپ حابارلايدى Almaty-akshamy.kz.

بۇرىنعىداي قوعامدىق ورىنداردا جۇقتىرۋ ءقاۋپى جوعارى — 49%، وتباسىلاردا — 22%، ال قوعامدىق كولىكتە — 18%.

كوبىنەسە 20 مەن 40 جاس ارالىعىنداعى ازاماتتاردىڭ 33%، 40 پەن 60 جاس ارالىعىنداعى ازاماتتاردىڭ 28%، ال 60 جاستان اسقانداردىڭ 25% ءجيى اۋىرادى. وسى جاس ساناتىنداعى ازاماتتار بارلىق ناۋقاستاردىڭ 86%-ىن قۇرايدى.

جانداربەك بەكشين قالا تۇرعىندارىن سانيتارلىق-ەپيدەميولوگيالىق تالاپتاردى قاتاڭ ساقتاۋعا شاقىردى: جابىق بولمەلەر مەن ادامدار كوپ جينالاتىن ورىندارعا بارعاندا بەتپەردە تاعۋدى، سونداي-اق ساپارعا ءجيى شىعۋدان، ادام كوپ جينالاتىن بۇقارالىق ءىس-شارالارعا بارۋدان اۋلاق بولۋدى ەسكەرتتى. اۋرۋدىڭ الدىن الۋدىڭ ماڭىزدى شاراسى — گيگيەنا، اسىرەسە، قولدى تازا ۇستاۋ.

ءسوزىنىڭ سوڭىندا جانداربەك بەكشين قالا تۇرعىندارىن بەلسەندى تۇردە ۆاكسينالانۋعا شاقىردى. ول ادامداردىڭ ءقاۋىپتى ينفەكسيادان قورعايتىن ۆاكسينا الماسا، اۋرۋدىڭ ازايمايتىنىن اتاپ ءوتتى.