جاستار ساياساتى باسقارماسىنىڭ، سونداي-اق ق ر مادەنيەت جانە اقپارات مينيسترلىگىنىڭ باستاماسىمەن، ۆەدومستۆولىق ۇيىمدارمەن جانە رەسپۋبليكالىق جاستار قوعامدىق بىرلەستىكتەرىمەن بىرلەسىپ، ايماقتاردى تازارتۋ بويىنشا «كيەلى تابيعات» رەسپۋبليكالىق ەكولوگيالىق سەنبىلىگى ءوتىپ جاتىر.
اتالعان شارا قالا كۇنىنە ورايلاستىرىلدى.
رەسپۋبليكالىق سەنبىلىكتە ءبىر مەزگىلدە ەلىمىزدىڭ بارلىق وڭىرىندە وبلىستىق جاستار ۇيىمدارىنىڭ وكىلدەرى، ستۋدەنتتەر مەن ەكولوگيالىق ەرىكتىلەر اۋماقتى قوقىستان تازارتىپ قانا قويماي، اعاش كوشەتتەرىن وتىرعىزدى.
ەكولوگيا سالاسىنداعى بەلسەندىلەر مەن ەكولوگتار كەلىپ، قوقىستى سۇرىپتاپ جيناۋدى ءتۇسىندىردى. ەكواكسياعا 14-35 جاس ارالىعىنداعى 300-گە جۋىق ەرىكتى جينالدى.
«بۇگىن مينيسترلىكتىڭ باستاماسىمەن الماتى قالاسى جاستار ساياساتى باسقارماسىنىڭ قولداۋىمەن اكسيا وتۋدە. كەشە ءدال وسى جەردى تازالاۋ جونىندە تۇرعىنداردان ءوتىنىش كەلىپ ءتۇستى. بۇل - مەدەۋ اۋدانىنداعى ەڭ كوپ قوقىس جينالعان ايماق.
باستى ماقسات - جاستار مەن قالا تۇرعىندارىنا تابيعاتتى ايالاپ ۇستاۋ يدەولوگياسىن جەتكىزۋ. مۇنداي ناۋقاندار قالامىزدا ءجيى ءوتىپ تۇرادى. ارنايى وسى باعىتتا جۇمىس ىستەيتىن ەكوبەلسەندىلەر مەن ەرىكتىلەر بار»، - دەدى الماتى قالاسى جاستار ساياساتىن دامىتۋ مەملەكەتتىك قور ديرەكتورىنىڭ مىندەتىن اتقارۋشى باعدات اناربايەۆا.«قالانى قوقىستان تازالاۋ، ونىڭ ىشىندە قوقىستى سۇرىپتاۋ - وتە وزەكتى ەكولوگيالىق ماسەلەلەردىڭ ءبىرى. تابيعاتتىڭ تازالىعىن ساقتاۋ ءۇشىن الدىمەن قوقىستان ارىلۋ شارت. تۇرمىستىق قالدىقتاردى سۇرىپتاپ بارىپ، قوقىس جاشىگىنە تاستاعان ءجون. جاستاردىڭ كوبى قاراپايىم قاعيدالاردى بىلمەي جاتادى. سوندىقتان وسىنداي ەكوشارالار ءجيى بولىپ تۇرۋ كەرەك دەپ سانايمىن. اسسامبلەيا جاستارى ءاردايىم قولداۋعا ، قاتىسۋعا ءازىر»، - دەيدى قازاقستان ۇيعىر جاستارى وداعىنىڭ ءتوراعاسى رۋستام كايرىيەۆ.
«اكسيا وتەتىنىن “قامقور” قورىنان ەستىدىم. ەكولوگيالىق شارالارعا ءجيى قاتىسىپ تۇرامىن. تازالىق ساقتالعان جەردە عانا تابيعاتقا زيان كەلمەيدى»، - دەيدى 169 مەكتەپتىڭ 10-سىنىپ وقۋشىسى جانسايا قۇسايىنوۆا.