الماتىدا قالا عيماراتتارىنا جازىلعان ەسىرتكى جارنامالارىن جويۋعا باعىتتالعان كەزەكتى «ناركوستوپ» اكسياسى ءوتتى. شارا الماتى قالاسى جاستار ساياساتى باسقارماسى مەن الماتى قالاسىنىڭ پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قولداۋىمەن ءوتتى، دەپ حابارلايدى aqshamnews.kz
اكسياعا 500-گە جۋىق ۆولونتەرلەر، ستۋدەنتتەر جانە كوميۋنيتي ورتالىقتاردىڭ رەزيدەنتتەرى قاتىستى. ولار الماتى قالاسىنىڭ پوليسيا دەپارتامەنتىنىڭ قىزمەتكەرلەرىمەن ەسىرتكى جارنامالارىنىڭ ورىندارىن انىقتاپ، ولاردىڭ زاڭسىز جازبالارىن ءوشىردى. رەيد بارىسىندا 1 كۇننىڭ ىشىندە عيماراتتاردىڭ سىرتقى قابىرعاسىنا جازىلعان 100-دەن اسا جارناما انىقتالىپ، جويىلدى.
اتالعان ءىس-شارانىڭ ماقساتى – جاستارعا ەسىرتكىنىڭ زياندىلىعىن تۇسىندىرە وتىرىپ، سالاۋاتتى ءومىردى تاڭداۋعا شاقىرۋ.
بۇگىن الماتى قالاسىنىڭ ۆولونتەرلەرى بولىپ جاستار ءۇشىن ماڭىزدى «ناركوستوپ» اكسياسىنا قاتىسۋعا كەلدىك. الماتى – ءبىزدىڭ ورتاق ءۇيىمىز، سوندىقتان شارا اياسىندا زاڭسىز جارنامالاردى ءوشىرىپ، ولاردىڭ ءار قاراي تارالماۋىنا كىشكەنە بولسا دا ءوز ۇلەسىمىزدى قوسىپ جاتىرمىز»، - دەدى ۆولونتەر امانعازى نۇراسىل.
ايتا كەتەيىك، اعىمداعى جىلى «ناركوستوپ» جوباسىنا قالا بويىنشا 3 مىڭنان استام ۆولونتەر قاتىستى. جوبا اياسىندا 60-تان استام ءىس-شارا وتكىزىلىپ، 2 مىڭ ترافارەت پەن گراففيتي ءوشىرىلدى.
سونىمەن قاتار، قالاداعى كوميۋنيتي-ورتالىقتاردا ناشاقورلىققا قارسى مادەنيەتتى قالىپتاستىرۋعا جانە ەسىرتكى اينالىمىنا قارسى قوعامدىق كۇرەسكە باعىتتالعان تۇسىندىرمە جۇمىستارى، ينتەللەكتۋالدىق ويىندار، دەباتتار، ۆيكتورينالار مەن كۆيزدەر جۇيەلى تۇردە ءوتتى.