الماتىدا VIII شاقىرىلعان الماتى ءماسليحاتىنىڭ كەزەكتەن تىس سەسسياسى ءوتىپ، وندا دەپۋتاتتاردىڭ قاراۋىنا 2024-2026 جىلدارعا ارنالعان بيۋدجەت جوباسى ۇسىنىلدى.
مەگاپوليس اكىمى ەربولات دوسايەۆ جول ينفراقۇرىلىمىن جاقسارتۋ جانە قوعامدىق كولىكتى دامىتۋ جوسپارىنا توقتالدى، دەپ حابارلايدى اlmaty-akshamy.kz.
ول بيىل قالانىڭ 70 كوشەسىندە 25 كم جاڭا جول سالىنعانىن اتاپ ءوتتى. كەلەسى جىلى اقجار، العاباس، المەرەك، قايرات، شاڭىراق-1، شۇعىلا، راحات-مادەنيەت، تەرەكتى شاعىن اۋداندارىندا بارلىعى 70 كم جول سالۋ جوسپارلانىپ وتىر. بيىل 200 كم جول ورتاشا جوندەۋدەن وتسە، 2024 جىلى قالانىڭ جاڭا اۋداندارىندا 23 ملرد.تەڭگەگە 250 كم جولعا ورتاشا جوندەۋ جۇرگىزىلەدى.
«مەملەكەت باسشىسىنىڭ تاپسىرماسىنا سايكەس، قوعامدىق كولىكتى گازعا جانە ەلەكتر تارتقىشقا اۋىستىرۋ جونىندەگى ەكولوگيالاندىرۋ جۇمىسى باستالدى. 2023 جىلى 750 ەكولوگيالىق تازا اۆتوبۋس ساتىپ الىندى، ونىڭ 600ء-ى قالالىق بيۋدجەت ەسەبىنەن. سوڭعى 11 جىلدا العاش رەت الماتىدا تروللەيبۋس پاركىن جاڭارتۋ باستالىپ، 100 تروللەيبۋس ساتىپ الىندى. بۇل رەتتە، كەلەسى جىلدان باستاپ الماتىدا ديزەلدى اۆتوبۋستار ساتىپ الىنبايدى. 2024 جىلى جالپى سوماسى 88،3 ملرد. تەڭگەگە تاعى 600 اۆتوبۋس، 100 تروللەيبۋس، سونىمەن قاتار، 100 ەلەكتروبۋس (2025 جىلى تاعى 100) ساتىپ الۋدى جوسپارلاپ وتىرمىز»، - دەدى قالا باسشىسى.
بۇعان قوسا، ەلەكتر كولىگىن دامىتۋ ءۇشىن 2024 جىلى تروتۋارلىق جانە الاڭدىق اۆتوتۇراقتاردا 150 ەلەكتر قۋاتتاۋ قۇرىلعىسى ورناتىلادى. 10 الەۋەتتى جەكە ينۆەستور تارتىلدى.
جول ينفراقۇرىلىمىن دامىتۋ اياسىندا بيىل «بۇقتىرما كوشەسى – قۇلجا تراكتىسى» جاڭا جولايىرىعى پايدالانۋعا بەرىلدى. 2024 جىلى اباي داڭعىلى مەن سايىن كوشەسىن ۇزارتۋ اياقتالادى، ءۇاااج باعىتىنا قاراي قالعان 3 راديالدى جولدى قالا شەكاراسىنا دەيىن ۇزارتۋ جالعاسادى. بۇعان جەرگىلىكتى بيۋدجەتتەن 6،4 ملرد. تەڭگە جانە رەسپۋبليكالىق بيۋدجەتتەن 9،4 ملرد.تەڭگە بولىنەدى. 927،3 ملن. تەڭگەگە 4 ىشكى ماگيسترالدىق جولدى ۇزارتۋ جالعاسادى.
سەيفۋللين-جانسۇگىروۆ كوشەلەرى مەن سايىن-اقىن سارا (موڭكە بي) كوشەلەرىنىڭ قيىلىسىندا جولايىرىق سالۋدى جالعاستىرۋعا 5،6 ملرد. تەڭگە قاراستىرىلعان.
الاتاۋ، اۋەزوۆ، المالى، بوستاندىق، جەتىسۋ، مەدەۋ جانە تۇركسىب اۋداندارىندا 25 رەتتەلەتىن جاياۋ جۇرگىنشىلەر وتكەلى سالىنادى.
جالپى، كەلەسى جىلى كولىك ينفراقۇرىلىمىن دامىتۋعا 244،1 ملرد. تەڭگە ءبولۋ جوسپارلانعان.